నామాకు ఈడీ సమన్లు

టీఆర్ఎస్ ఎంపీ నామా నాగేశ్వరరావుకు ఎన్ ఫోర్స్ మెంట్ డైరెక్టరేట్ (ఈడీ) షాక్ ఇచ్చింది. బ్యాంకు రుణాల మళ్లింపు కేసులో ఈనెల 25న విచారణకు హాజరుకావాలని సమన్లు జారీచేసింది. జార్ఖండ్ లో నామాకు చెందిన మధుకాన్ కంపెనీ చేపట్టిన నేషనల్ హైవే ప్రాజెక్టు కోసం తీసుకున్న బ్యాంకు రుణాలను పక్కదారి పట్టించారనే ఆరోపణలపై ఈడీ ఇటీవల తనిఖీలు చేసిన సంగతి తెలిసిందే. నామా నివాసం, కార్యాలయాలతోపాటు మధుకాన్ సంస్థ డైరెక్టర్ల ఇళ్లు, కార్యాలయాలపై ఏకకాలంలో సోదాలు చేసి కీలకమైన డాక్యుమెంట్లు స్వాధీనం చేసుకుంది. అనంతరం ఈ కేసులో నిందితులందరికీ ఇప్పటికే సమన్లు జారీచేసింది. తాజాగా నామా నాగేశ్వరావుకు కూడా సమన్లు జారీచేసి, విచారణకు హాజరుకావాలని ఆదేశించింది. జార్ఖండ్ లో రాంచీ-రార్ గావ్-జంషెడ్ పూర్ మధ్య 163 కిలోమీటర్ల పొడవైన నేషనల్ హైవే పనులను మధుకాన్ కంపెనీ 2011లో దక్కించుకుంది. అనంతరం కెనరా బ్యాంకు నుంచి ఈ ప్రాజెక్టు కోసం రూ.1029.30 కోట్లు రుణం తీసుకుంది. అయితే, ఇందులో రూ.264.01 కోట్లను పక్కదారి పట్టించినట్టు ఆరోపణలు రావడంతో సీబీఐ కేసు నమోదు చేసి దర్యాప్తు చేసింది. దీని ఆధారంగా ఈడీ రంగంలోకి దిగి సోదాలు చేసింది.