సచివాలయం కూల్చివేతకు గ్రీన్ సిగ్నల్ ఇచ్చిన తెలంగాణ హైకోర్టు

తెలంగాణలో కొత్త సచివాలయ నిర్మాణానికి ఎదురైన ఆటంకాలు తొలగిపోయాయి. పాత సచివాలయం కూల్చేందుకు హైకోర్టు గ్రీన్ సిగ్నల్ ఇచ్చింది. దీంతో కొత్త సచివాలయ నిర్మాణానికి దారులు ఏర్పడ్డాయి. ఇందుకు సంబంధించి ప్రభుత్వ వాదనలతో హైకోర్టు ఏకీభవించింది. దీనిపై క్యాబినెట్ తీసుకున్న నిర్ణయాన్ని తప్పుబట్టలేమని పేర్కొంది. దీంతో ఈ కేసులో నమోదైన కేసుల్ని కొట్టేసింది.

ప్రస్తుత సచివాలయ కూల్చివేతను తప్పుబడుతూ పలువురు వేర్వేరుగా 10 పిటిషన్లను హైకోర్టులో దాఖలు చేశారు. సచివాలయంలో కొత్త భవనాలు ఉన్నాయని.. హెరిటేజ్ భవనాలుగా చూడాలంటూ తన పిటిషన్లలో పేర్కొన్నారు. దీనిపై హైకోర్టులో కొన్ని రోజులుగా వాదనలు జరుగుతున్నాయి.

విధానపరమైన నిర్ణయాలపై కోర్టులు జోక్యం చేసుకోకూడదంటూ ప్రభుత్వం వాదించింది. కొత్త సచివాలయ నిర్మాణానికి వందల కోట్లు వృధా చేస్తున్నారని పిటిషనర్లు వాదించారు. ప్రస్తుత అవసరాలకు సరిపోవడం లేదని ప్రభుత్వం వాదించింది. ఇరుపక్షాల వాదనలు విన్న హైకోర్టు ప్రభుత్వ వాదలనతో ఏకీభవించి అనుకూలంగా తీర్పు ఇచ్చింది.

కొత్త సచివాలయం నిర్మాణానికి పాత సచివాలయం కూల్చేయాలని ప్రభుత్వం నిర్ణయం తీసుకుంది. ఇందుకనుగుణంగా గతంలోనే సెక్రటేరియట్ లోని పలు కార్యాలయాలు వేర్వేరు భవనాలకు తరలించారు కూడా. ఇప్పడు హైకోర్టు తీర్పుతో కొత్త సచివాలయం నిర్మాణానికి తెలంగాణ ప్రభుత్వానికి అడ్డంకులు తొలగిపోయాయి.