దొంగలా దాడి.. మరోసారి ‘దాసరి’ కుమారుల ఆస్తి గొడవలు.!

తెలుగు సినీ పరిశ్రమలో ప్రస్తుతం దాసరి గారు లేని లోటు చాలా ప్రస్ఫుటంగా కనిపిస్తోంది. ఆయన ఉన్నప్పుడు ఓ పెద్దన్నలా ఇండస్ట్రీలో ఎవరికీ ఏ కష్టం వచ్చిన తన భుజాలపై వేసుకొని పరిష్కరించేవాడు. ఆయన స్వర్గస్తులయ్యాక ఇటు ఇండస్ట్రీలోనే కాదు తన సొంత కుటుంబంలోనూ ఆస్తి వివాదం తలెత్తడం వలన వారి కుటుంబంలో పెద్ద దిక్కు లేదనేది పక్కాగా తెలుస్తోంది.

దాసరి నారాయణరావుకి ప్రభు, అరుణ్ కుమార్ అనే ఇద్దరు కుమారు. ఆయన స్వర్గస్తులైన నాటి నుంచి వీరిద్దరి మధ్యా ఆస్తి గొడవలు జరుగుతున్నాయి. గత కొద్దీ రోజులుగా సైలెంట్ గా ఉన్న ఈ ఆస్తి వివాదం మళ్ళీ రాజుకుంది. ప్రభు ఇంట్లోకి అక్రమంగా చొరబడిన అరుణ్ కుమార్ బీరువా బద్దలు కొట్టాలని ప్రయత్నించి, ఇంట్లో వారిపై దాడికి ప్రయత్నించాడని ప్రభు జూబ్లీహిల్స్ పోలీస్ స్టేషన్‌లో ఫిర్యాదు చేశారు. సినీ ప్రముఖులు, తన తండ్రికి ఆప్తులు అయిన మోహన్‌బాబు, మురళీమోహన్‌, సి.కల్యాణ్‌ దీనిపై వెంటనే స్పందించి తనకు న్యాయంచేయాలని ప్రభు కోరారు.

ఈ నెల 24వ తేదీన ప్రభు ఇంట్లోకి గేటు దూకి వచ్చిన అరుణ్ కుమార్, ప్రభు రూమ్ లోకి చొరబడి బీరువాని బద్దలు కొట్టాలని ప్రయత్నించడమే కాకుండా మద్యం తాగి వచ్చిన తను ఇంట్లో వారిపై దాడి చేసాడని, తండ్రి వీలునామా ప్రకారం ఆ ఇల్లు తన కూతురికి చెందుతుందంటూ తమపై దౌర్జన్యానికి పాల్పడిన అరుణ్‌పై వెంటనే చర్యలు తీసుకోవాలని ప్రభు పోలీసులని డిమాండ్ చేశారు. అరుణ్ కుమార్ చేసిన రచ్చ అంతా సీసీటీవీ లో రికార్డ్ అవ్వడంతో ఆ ఫుటేజ్ ని పోలీసులు స్వాధీనం చేసుకొని విచారణ మొదలు పెట్టారు.

దాసరి గారు తన తదనంతరం ఆయన ఆస్తిని పంపకాలు చేసే పనిని మోహన్‌బాబు, మురళీమోహన్‌, సి.కల్యాణ్‌ లకు అప్పగిస్తూ దాసరి వీలునామా రాశారు. వీలునామా ప్రకారమే ఈ ముగ్గురు ఎన్నిసార్లు ఆస్తి వివాదం పరిష్కరించాలని ట్రై చేసినా వీలు కాలేదు. దాంతో అరుణ్ కుమార్ ఇప్పుడిలా చేయడంతో కొత్త సమస్య మొదలైంది.