అప్పులిచ్చే వీరమ్మ హత్య, వారం తర్వాత లభ్యమయిన శవం

కృష్ణా జిల్లా అవనిగడ్డ నియోజకవర్గం నక్కవానిదారి గ్రామానికి చెందిన మట్టా వీరమ్మ అనే 65 ఏళ్ల వృద్దురాలును గుర్తు తెలియని వారు హత్య చేసి ఊరు చివర చెట్లల్లో పడేశారు. గత వారం రోజులుగా వీరమ్మ కనిపించకుండా పోవడంతో కుటుంబ సభ్యులు పోలీసులకు ఫిర్యాదు చేశారు. పోలీసులు మిస్సింగ్‌ కేసు నమోదు చేసి ఎంక్వౌరీ చేస్తున్నారు. ఈ సమయంలోనే గ్రామం శివారులో ఒక గుర్తు తెలియని శవం పడి ఉందని పోలీసులకు సమాచారం అందింది. దాంతో అక్కడకు చేరుకున్న పోలీసులు వీరమ్మ బంధువులను అక్కడకు రప్పించగా వారు వీరమ్మ శవంగా గుర్తించారు.

వారం రోజుల క్రితం ఆమెను హత్య చేసి ఉంటారు అంటూ పోలీసులు భావిస్తున్నారు. శవం బాగా కుల్లి పోయి ఉంది. దాంతో అక్కడికి అక్కడే పోస్ట్‌ మార్టం పూర్తి చేసి బాడీని కుటుంబ సభ్యులకు అప్పగించారు. వీరమ్మ గ్రామంలో తన వద్ద ఉన్న కొంత మొత్తం డబ్బును వడ్డీలకు ఇస్తూ ఉంటుంది. రోజు వారి వడ్డీలను వసూళ్లు చేసుకుంటూ ఉంటుంది. గ్రామం శివారులో పేకాట ఆడేవారికి కూడా అవసరానికి వస్తువులు తాకట్టు పెట్టుకుని వీరమ్మ అప్పు ఇచ్చేది. అలా పేకాట ఆడేవారికి అప్పు ఇచ్చేందుకు వీరమ్మ వెళ్లిన సమయంలోనే పేకాట ఆడేవాళ్లు వీరమ్మను చంపేసి ఉంటారు అంటూ పోలీసులు అనుమానం వ్యక్తం చేస్తున్నారు.