కరోనా టెర్రర్‌: ఏపీ తాజా లెక్క 87.. అసలేం జరుగుతోంది.?

ఆంధ్రప్రదేశ్‌లో అనూహ్యమైన రీతిలో కరోనా వైరస్‌ పాజిటివ్‌ కేసులు వెలుగు చూస్తున్నాయి. తాజాగా ఈ లెక్క 87కి చేరుకుంది. నిన్న రాత్రి 44 వద్ద వున్న ఈ లెక్క, ఈ రోజు ఉదయం 58కి చేరుకుంది. కాస్సేపటికే మొత్తం లెక్క 87గా తేలింది. సాయంత్రానికి పరిస్థితి ఎలా వుంటుందో ఊహించడానికే కొంత ఆందోళనగా వుంది.

అయితే, నమోదువుతున్న కేసుల్లో ఎక్కువగా ‘కేరాఫ్‌ ఢిల్లీ’ వుండడం గమనార్హం. ఢిల్లీలో ఇటీవల జరిగిన జమాత్‌కి వెళ్ళి వచ్చినవారిలో ఎక్కువగా ఈ కరోనా పాజిటివ్‌ కేసులు వెలుగు చూస్తున్నాయి. ఢిల్లీకి వెళ్ళొచ్చినవారి కుటుంబ సభ్యుల్లోనూ కరోనా పాజిటివ్‌ కేసులు బయటపడ్తుండడంతో ప్రభుత్వంలోనూ అలజడి కన్పిస్తోంది. ‘ఆంధ్రప్రదేశ్‌కి విదేశాల నుంచి డైరెక్ట్‌గా వచ్చే ప్రయాణీకులు తక్కువ గనుక.. పెద్దగా ఆందోళన చెందాల్సిన అవసరం లేదు..’ అని ఆ మధ్య ముఖ్యమంత్రి వైఎస్‌ జగన్‌ వ్యాఖ్యానించారు.

కానీ, పరిస్థితి ఇప్పుడు చెయ్యి దాటిపోతున్నట్లుగా కన్పిస్తోంది. తెలంగాణలో ప్రస్తుతం 92 వద్ద వుంది కరోనా పాజిటివ్‌ కేసుల సంఖ్య. ఈ సంఖ్యని దాటేయడానికి ఆంధ్రప్రదేశ్‌కి పెద్దగా సమయం పట్టకపోవచ్చు. అయితే, అత్యంత చాకచక్యంగా కరోనా అనుమానితుల్ని గుర్తించడంతోనే ఎక్కువ కేసులు బయటపడ్తున్నాయనీ, మరీ అంత ఆందోళన చెందాల్సిన పరిస్థితులు ఆంధ్రప్రదేశ్‌లో లేవని అధికార పార్టీ నేతలు చెబుతున్నారు. అయినాగానీ, ఒక్కసారిగా కేసుల సంఖ్య పెరగడంతో రాష్ట్ర ప్రజల్లో భయాందోళనలు నెలకొంటున్నాయి.

ఇదిలా వుంటే, తెలంగాణలోనూ కరోనా పాజిటివ్‌ కేసులు విపరీతంగా పెరిగే అవకాశం వుందన్న చర్చ జరుగుతోంది. దానిక్కారణం, తెలంగాణ నుంచీ పెద్ద సంఖ్యలో ఇటీవల ఢిల్లీకి వెళ్ళి జమాత్‌లో పాల్గొని వచ్చారు. వారందర్నీ గుర్తించే ప్రయత్నంలో ప్రభుత్వం ఇప్పటికే చర్యలు చేపట్టింది.