దాసరిపై అభిమానం నా కెరీర్‌ను నాశనం చేసింది

మంచు విష్ణు కెరీర్‌లో అత్యంత దారుణమైన ఫ్లాప్స్‌ చాలానే ఉన్నాయి. వాటిల్లో ఇంకా దారుణమైన సినిమా అంటే ఎర్ర బస్సు అని ఠక్కున చెప్పవచ్చు. దర్శకరత్న దాసరి నారాయణ రావు ఆ సినిమాను తెరకెక్కించాడు. ఆ సినిమా తన కెరీర్‌ నాశనంకు దారి తీసింది అంటూ మంచు విష్ణు ఇప్పుడు సంచలన వ్యాఖ్యలు చేశాడు. ఎన్నో సినిమాలు చేసిన మంచు విష్ణు ఎర్ర బస్సు సినిమాను మాత్రం కనీసం కథ ఏంటీ తన పాత్ర ఏంటీ అనేది కూడా కనుక్కోకుండా చేశాడట.

తాజాగా మంచు విష్ణు ఒక వెబ్‌ మీడియాకు ఇచ్చిన ఇంటర్వ్యూలో ఈ విషయాన్ని వెళ్లడి చేశాడు. ఒక రోజు దాసరి గారు నాకు ఫోన్‌ చేసి సినిమా చేద్దాం అంటూ అడిగారు. అంతటి పెద్ద వ్యక్తి అడిగినప్పుడు కథ ఏంటీ అనే విషయాన్ని కూడా అడగాలనిపించలేదు. నా తండ్రికి సినీ జీవితాన్ని ఇచ్చిన ఆయన్ను ప్రశ్నించే వాడిని కాదు.. ఆయన స్థాయిలో ఆలోచించే వాడిని కాదు. అందుకే మారు మాట్లాడుకుండా ఆయన దర్శకత్వంలో సినిమా చేయాలనే నిర్ణయానికి వచ్చాను.

కథ విషయాన్ని నేను చివరి వరకు కూడా ఆయన్ను అడగలేదు. ఆయన చెప్పినట్లుగా చేసుకుంటూ పోయాను. సినిమా ఎలా ఉన్నా అంతటి గొప్ప దర్శకుడి దర్శకత్వంలో నటించాననే సంతృప్తి ఉంటుందని నిర్ణయానికి వచ్చాను. అందుకే ఆ సినిమాలో నటించాను. ఏమాత్రం ఆలోచన లేకుండా సినిమా చేసినా కూడా చివరకు ఆ సినిమా ఫలితం తేడా కొట్టడం ఖాయం అనిపించినా కూడా చేశానంటూ మంచు విష్ణు చెప్పుకొచ్చాడు.

ఆ సినిమా తన కెరీర్‌లో ఒక దారుణమైన సినిమాగా నిలిచిందని అన్నాడు. అయినా కూడా ఆ సినిమా నాకు ఒక అద్బుతమైన అనుభవం అంటూ చెప్పుకొచ్చాడు. మొత్తానికి దాసరి దర్శకత్వంలో సినిమా నా కెరీర్‌ను నాశనం చేసింది అంటూనే ఆయన పెద్దరికాన్ని గౌరవించి ఆయన ఆయనతో సినిమా చేసినందుకు ఆనందంగానే ఉందని చెప్పుకొచ్చాడు.