ఎన్నికలపై జగన్ కీలక నిర్ణయం… ఏప్రిల్ నెలలో మధ్యాహ్నంలోపే అందివ్వాలి…!!

ఈనెలలోనే ఆంధ్రప్రదేశ్ స్థానిక సంస్థల ఎన్నికలకు ప్రభుత్వం రంగం సిద్ధంచేస్తోంది. ఈ నెలాఖరులోగా ఎన్నికలను పూర్తి చేయాలని ప్రభుత్వం ఆదేశాలు జారే చేసిన సంగతి తెలిసిందే. అలానే ఎన్నికల్లో ఎట్టి పరిస్థితుల్లో మద్యం, డబ్బు హవా ఉండకూడదని, పోలీసులు నిఘా వ్యవస్థ సమర్ధవంతంగా పనిచేయాలని, ఎవరైనా సరే ప్రలోభాలకు గురి చేయడం, డబ్బు, మద్యం పంచడం వంటివి చేస్తే వారిపై కఠిన చర్యలు తీసుకోవాలని జగన్ అధికారులను ఆదేశించారు.

ఇంత హడావుడిగా ఈ నెలాఖరులోగా ఎన్నికలు నిర్వహించాలని పట్టుబట్టడం వెనుక చాలా కారణాలు ఉన్నాయి. ఈనెలాఖరులోగా ఎన్నికలు నిర్వహించకుంటే 14 వ ఆర్ధిక సంఘం నుంచి అందాల్సిన నిధులు ఆగిపోతాయి. అందుకే రిజర్వేషన్ల విషయంలో పట్టుబట్టకుండానే ఎన్నికలను నిర్వహించేందుకు సిద్ధం అయ్యింది ప్రభుత్వం.

అంతేకాదు, ఈనెల లబ్దిదారులకు పింఛన్ అందించడం ఆలస్యం కావడంతో జగన్ సీరియస్ అయ్యాడు. ఏప్రిల్ నెలలో మధ్యాహ్నం 2 గంటల వరకు లబ్దిదారులకు పింఛన్ అందించేలా చర్యలు తీసుకోవాలని ఆదేశించారు. కరోనా వైరస్ విషయంలో తగిన జాగ్రత్తలు తీసుకోవాలని, కరపత్రాలు రిలీజ్ చేసి ప్రజలను చైతన్య వంతులను చేయాలని జగన్ అధికారులను ఆదేశించారు.

స్థానిక సంస్థల ఎన్నికలు వస్తున్న వేళ మద్యం, డబ్బు విచ్చలవిడిగా పంపకాలు జరిగే అవకాశం ఉన్నది. కానీ, గతంలో దీనిపై జగన్ ప్రభుత్వం ఓ ఆర్డినెన్స్ ను తీసుకొచ్చిన సంగతి తెలిసిందే. ఆర్డినెన్స్ ప్రకారం అభ్యర్థి డబ్బు, మద్యంతో పట్టుబడితే మూడేళ్లు జైలు, పదివేల రూపాయల జరిమానా విధిస్తారు. ఎన్నికల్లో పోటీ చేసే అర్హతను కూడా కోల్పోవాల్సి వస్తుంది. ఇది మంచి నిర్ణయమే… అమలు జరిగితే…