తమిళ్లోనూ పవన్ దే హవా: పికె కథతో తమిళ్ స్టార్ మూవీ.!

పవన్ కల్యాణ్ కోసం రాసుకొన్న కథలు పక్కహీరోలకు వెళ్లిన సందర్భాలు తెలుగునాట కోకొల్లలు. అతడు, పోకిరి, ఇడియట్ వంటివి జస్ట్ ఎగ్జాంపుల్స్ మాత్రమే. పవన్ అందుబాటులో లేకపోవడమో, నో చెప్పడమో జరగడంతో దర్శకులు ఆ కథలతో పక్క హీరోలతో సినిమాలు తీశారు. కొందరు దర్శకులు పవన్ దగ్గరకు వెళ్లలేక మరో హీరో దగ్గరకు వెళ్లిన సందర్భాలు ఉన్నాయి.

తెలుగు దర్శకుల్లో మాత్రమే కాదు, తమిళ దర్శకుల్లోనూ పవన్ కల్యాణ్‌కి విపరీతమైన క్రేజ్ ఉంది. పవర్ స్టార్ కోసం వాళ్లూ కథలు రాస్తున్నారు. కానీ, పవన్ దొరక్క అక్కడి హీరోలతో సినిమాలు తీస్తున్నారు. లేటెస్ట్ ఎగ్జాంపుల్… ‘విజయ్ సేతుపతి’. తమిళంలో విజయ్ సేతుపతి, రాశి ఖన్నా, నివేదా పేతురాజ్ హీరో హీరోయిన్లుగా నటించిన ‘సంగ తమిళన్’కు తెలుగు డబ్బింగ్ ఇది. పవన్ కల్యాణ్ కోసం ఈ కథ రాశానని దర్శకుడు విజయ్ చందర్ తెలిపారు. “ఈ సినిమా ట్రైలర్స్, సాంగ్స్ చూసి తెలుగు సినిమాల ఉందని అందరూ చెబుతున్నారు. తెలుగులో స్టార్ హీరో పవన్ కోసం ఈ కథ రాసుకున్నాను. ఆయనకు చెప్పాలని ప్రయత్నించా. కుదరలేదు. ఏయం రత్నంగారి నిర్మాణంలో ‘వేదాళం’ రీమేక్ చేయాలని అనుకున్నారు. తర్వాత రాజకీయాల్లోకి వెళ్లారు” అని విజయ్ చందర్ అన్నారు. ఈ శుక్రవారం ‘విజయ్ సేతుపతి’ ప్రేక్షకుల ముందుకొస్తోంది. జూనియర్ ఎన్టీఆర్, రామ్ చరణ్ కోసం తన దగ్గర కథలు ఉన్నాయని విజయ్ చందర్ అంటున్నారు. ఇతడు గతంలో విక్రమ్ తో ‘స్కెచ్’ తీశాడు.

తెలుగులో తమిళ హీరోలకు కాస్త పేరు వస్తే చాలు, వాళ్లు నటించిన తమిళ సినిమాలను తెలుగు మార్కెట్ మీదకు తోసే కార్యక్రమాలు మొదలవుతాయి. తమిళ హీరో విజయ్ సేతుపతికి తెలుగు రాష్ట్రాల్లో అర్బన్ ఆడియన్స్‌లో ఫ్యాన్స్ ఉన్నారు. అతడు నటించిన తమిళ సినిమాలను సబ్ టైటిల్స్‌తో చూసేవారున్నారు. ‘సైరా నరసింహారెడ్డి’లో రాజా పాండీ పాత్రలో నటించి, బిసి సెంటర్స్ ఆడియన్స్‌లో సైతం విజయ్ సేతుపతి గుర్తింపు తెచ్చుకున్నాడు. గతంలో విజయ్ సేతుపతి నటించిన సినిమాలు కొన్ని తెలుగులో డబ్ అయ్యాయి. ఈ సినిమాకు వచ్చినంత క్రేజ్ వాటికి రాలేదనేది అక్షర సత్యం. ఇదంతా సైరా ఎఫెక్ట్.