రిలీజ్ వార్: బాలయ్య- నితిన్-రవితేజ-సాయి తేజ్-శర్వాల గందరగోళం.!

గత కొద్దీ రోజులుగా సంక్రాంతి బరిలో ఏయే సినిమా ఏయేఏ తారీఖుల్లో రావాలా అనే దానిమీద హై టెన్షన్ నెలకొంది. ఫైనల్ గా వాళ్ళు డిసైడ్ అయ్యారు అనుకునే టైంకి డిసెంబర్ లో రిలీజ్ కానున్న సినిమాల మధ్య వార్ మొదలైంది. ఇప్పటికే పలు సినిమాలను డిసెంబర్ చివర్లో క్రిస్మస్ సీజన్ లో రిలీజ్ చేయడానికి ప్లాన్ చేశారు. కానీ క్రిస్మస్ సీజన్ లో రెండు, మూడు సినిమాల విడుదలే కష్టం. కానీ అలాంటిది ప్రస్తుతం క్రిస్మస్ బరిలో 5 స్ట్రైట్ తెలుగు సినిమాలు, 1 డబ్బింగ్ సినిమా ఉంది. ఆ సినిమాల రిలీజ్ డేట్స్ ఎలా మారనున్నాయి అనే విషయానికి వెళ్తే..

1. నందమూరి బాలకృష్ణ – కెఎస్ రవికుమార్ డైరెక్షన్ లో రూపొందుతున్న సినిమాని ప్రస్తుతానికి డిసెంబర్ 20 లేదా 21వ తేదీన రిలీజ్ చేయడానికి లాక్ చేశారు. ముందు రిలీజ్ వాయిదా వేద్దాం అనుకున్నా మళ్ళీ ఈ డేట్ కే ఫిక్స్ అయ్యారు బాలయ్య టీం.

2. నితిన్ హీరోగా – రష్మిక హీరోయిన్ గా రానున్న ‘భీష్మ’ సినిమాని డిసెంబర్ 20న రిలీజ్ చేయనున్నామని షూట్ ప్రారంభం అప్పుడే అనౌన్స్ చేశారు కానీ ఇప్పుడున్న చాలా సినిమాల రిలీజ్ క్లాష్ వల్ల క్రిస్మస్ పోటీ నుంచి తప్పుకుని, ఫిబ్రవరిలో రిలీజ్ ప్లాన్ చేస్తున్నారు.

3. మాస్ మహారాజ్ రవితేజ ‘డిస్కోరాజా’ కూడా ముందు నుంచి డిసెంబర్ 20 రిలీజ్ కి షెడ్యూల్ అయ్యింది కానీ ఈ సినిమా షూట్ ఇంకా బాలన్స్ ఉండడం, గ్రాఫిక్స్ కూడా ఎక్కువ స్కోప్ ఉండడం వల్ల టైం పడుతోంది. వీటన్నిటికీ మించి బాక్స్ ఆఫీస్ క్లాష్ వల్ల రిలీజ్ వాయిదా వేయనున్నారు. అందులో భాగంగా ఫిబ్రవరి లేదా సమ్మర్ ఎర్లీ రిలీజ్ గా ఏప్రిల్ లో విడుదలకి ప్లాన్ చేస్తున్నారు.

4. సాయి ధరమ్ తేజ్ – రాశీఖన్నా – మారుతి కాంబినేషన్ లో వస్తున్న ‘ప్రతిరోజూ పండగే’ సినిమా డిసెంబర్ 20న రిలీజ్ కానుంది. ఇప్పటికైతే ఈ సినిమా అదే డేట్ కి ఫిక్సయ్యి ఉంది.

5. శర్వానంద్ – సమంత మొదటిసారి జోడీ కట్టి తమిళ బ్లాక్ బస్టర్ మూవీ ’96’కి రీమేక్ గా రూపొందిన ‘జాను’ సినిమా కూడా క్రిస్మస్ బరిలో ఉంది. దిల్ రాజు ఎంతో ఇష్టపడి రీమేక్ చేస్తున్న ఈ సినిమా ప్రస్తుతానికైతే క్రిస్మస్ బరిలో ఉంది, మరి బిజినెస్ దృష్ట్యా దిల్ రాజు డేట్ మారుస్తారేమో చూడాలి.

6. ఇది కాకూండా బాలీవుడ్ స్టార్ హీరో సల్మాన్ ఖాన్ నటించిన బ్లాక్ బస్టర్ సీరీస్ ‘దబాంగ్ 3’ కూడా క్రిస్మస్ కి తెలుగులో రిలీజ్ కానుంది. తెలుగు సినిమాలే సతమతమవుతున్న టైంలో ఈ సినిమా తెలుగులో మరో భారమనే చెప్పాలి.

ప్రస్తుతానికి నితిన్ ‘భీష్మ’, రవితేజ ‘డిస్కోరాజా’ టీంలు క్రిస్మస్ బారి నుంచి పక్కకి తప్పుకోవడానికి నిర్ణయం తీసుకున్నాయి. మరి ఫైనల్ గా క్రిస్మస్ కి ఎన్ని సినిమాలు సందడి చేస్తాయి అనేది ముందు ముందు ఖరారయ్యే ఛాన్స్ ఉంది.