బీజేపీలో జోష్‌ నింపిన జగన్‌.. కారణం ఇదేనా.?

ఇటీవల ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌ రెడ్డి ఢిల్లీకి వెళ్ళొచ్చారు. కేంద్ర ప్రభుత్వ పెద్దలతో సమావేశమయ్యారు. రాష్ట్రానికి కేంద్రం నుంచి రావాల్సిన నిధుల విషయమై చర్చించారు. మళ్ళీ ఇంకోసారి జగన్‌, ఢిల్లీకి వెళ్ళాల్సి వుంది. ప్రధాని నరేంద్రమోడీతో భేటీ కావాల్సి వుంది. అంతకన్నా ముందే, వైఎస్‌ జగన్‌ మోహన్‌రెడ్డి ఆసక్తికరమైన నిర్ణయం తీసుకున్నారు.

‘రైతు భరోసా’ పథకానికి ‘వైఎస్సార్‌ పేరుతోపాటు అదనంగా పీఎం కిసాన్‌’ని కూడా జోడించారు. తొలుత ప్రకటించినట్లు ఏడాదికి 12,500 రూపాయలు కాకుండా, రైతులకు అదనంగా మరో వెయ్యి రూపాయలు కలిపి.. మొత్తంగా 13,500 రూపాయల్ని ఏడాదికి అందించబోతున్నారు.. అదీ మూడు విడతలుగా.

నిజానికి, ఇందులో కేంద్రం వాటా కూడా వుంది. ఎన్నికల ప్రచారంలో 12,500 ఇస్తామని చెప్పి.. ఇప్పుడు కేంద్రం ఇచ్చే వాటాని కలుపుతామనడం ఎంతవరకు సబబు.? అన్న విమర్శలు విపక్షాల నుంచి వెల్లువెత్తుతున్నా.. జగన్‌ ప్రభుత్వం తన పని తాను చేసుకుపోతోంది.

మరోపక్క, కేంద్రం ఇచ్చే నిధులతో సంక్షేమ పథకాలు చేపడుతూ, వాటికి వైఎస్సార్‌ పేరు పెట్టడమేంటి.? అన్న విమర్శలు బీజేపీ నుంచి గట్టిగానే విన్పిస్తున్నాయి. ఇదిలా వుంటే, పోలవరం సహా అనేక అంశాల్లో వైఎస్‌ జగన్‌ ‘రివర్స్‌’ తీరు పట్ల కేంద్రం గుర్రుగా వుంది. సరిగ్గా ఈ టైమ్‌లో వైఎస్‌ జగన్‌, తమ ప్రభుత్వం చేపడుతున్న సంక్షేమ పథకాలకు సంబంధించి ఓ పథకానికి కేంద్రం పేరుని కూడా జోడించడం గమనార్హం.

ఇది కేవలం కేంద్రంలోని నరేంద్ర మోడీ ప్రభుత్వాన్ని ప్రసన్నం చేసుకోవడానికేననీ, వెయ్యి పెంచడం వెనుక పరమార్థం.. కూడా వేరే వుందనీ రాజకీయ విశ్లేషకులు అభిప్రాయపడుతున్నారు. కారణాలేవైతేనేం.. రైతన్నకు ఊరట కలిగించే నిర్ణయం తీసుకున్నందుకు వైఎస్‌ జగన్‌ ప్రభుత్వాన్ని అభినందించి తీరాలి.

మరోపక్క, పీఎం కిసాన్‌.. అన్న పేరు కూడా పథకానికి జోడించడం పట్ల బీజేపీ రాష్ట్ర అధ్యక్షుడు కన్నా లక్ష్మినారాయణ హర్షం వ్యక్తం చేశారు. ఇక్కడితో కేంద్రం – రాష్ట్రం మధ్య పంచాయితీ చల్లారినట్లేనా.? జగన్‌ త్వరలో ఢిల్లీకి వెళ్ళి, ప్రధానితో సానుకూల చర్చలు జరుపుతారా.? రాష్ట్రానికి కేంద్రం నుంచి రావాల్సిన నిధుల్ని తీసుకురాగలుగుతారా.? రివర్స్‌ వ్యవహారంలో కేంద్రాన్ని జగన్‌ ఒప్పించగలుగుతారా.? వేచి చూడాల్సిందే.