చంద్రబాబు ‘మాస్’ ర్యాగింగ్: వైసీపీ వద్ద సమాధానమేదీ.?

వామ్మో, చంద్రబాబులో వున్నపళంగా ఇంత ఎనర్జీ ఎలా వచ్చేసింది.? వైఎస్ వివేకానందరెడ్డి హత్య కేసు విషయమై చంద్రబాబు వేసిన తాజా ఛలోక్తులు చూసి వైసీపీ శ్రేణులే విస్తుపోతున్నాయి. ‘చచ్చినపాము’లా చంద్రబాబుని వైసీపీ భావిస్తూ వచ్చింది ఇప్పటిదాకా. అంత దారుణమైన రీతిలో వైసీపీ, 2019 ఎన్నికల్లో టీడీపీని చావు దెబ్బ కొట్టింది.

సరే, రాజకీయాల్లో గెలుపోటములు సహజం. నిన్న టీడీపీకి తగిలితే, అంతకు మించిన దెబ్బ రేపు వైసీపీకి తగలొచ్చు. అది వేరే సంగతి. ఏపీ రాజధాని అమరావతికి సంబంధించి న్యాయస్థానం ఇచ్చిన తీర్పు, టీడీపీలో కొత్త ఉత్సాహాన్ని నింపింది. మరీ ముఖ్యంగా చంద్రబాబుకి కొండంత బలాన్నిచ్చింది. ఎందుకంటే, చంద్రబాబే కదా, అమరావతిని రాజధానిగా తన హయాంలో ప్రకటించింది. చంద్రబాబే కదా, సీఆర్డీయేని తెరపైకి తెచ్చి.. రైతులకీ, ప్రభుత్వానికీ మధ్య ఒప్పందాలు కుదిరేలా చేసింది.

ఆ ఒప్పందాల ప్రకారమే రైతులకు న్యాయం చేయాలని కోర్టు తీర్పునివ్వడంతో చంద్రబాబులో కొత్త ఉత్సాహం కనిపించింది. ఈ జోరులోనే, వైఎస్ వివేకానందరెడ్డి హత్య సహా పలు అంశాలపై చంద్రబాబు తనదైన సెటైర్లతో వైఎస్ జగన్ మోహన్ రెడ్డి మీద విరుచుకుపడ్డారు.

‘నారాసుర రక్త చరిత్ర అన్నారు.. ఇప్పుడేమో జగనాసుర రక్త చరిత్ర అని తేలుతోంది.. వైఎస్ వివేకానందరెడ్డి హత్య ద్వారా వైఎస్ జగన్ రెండు రకాలుగా మేలు పొందారు. తనకు అడ్డంకిగా మారిన వివేకాను వైఎస్ జగన్ తొలగించుకున్నారు. అదే సమయంలో, ఆ సింపతీని అడ్డంపెట్టుకుని, టీడీపీ మీద బురదచల్లి, ప్రజల్ని వంచించి, మభ్యపెట్టి అధికారంలోకి వచ్చారు..’ అని చంద్రబాబు విమర్శించారు.

అంతేనా, ‘టీడీపీ మనిషిగా వైఎస్ వివేకానందరెడ్డి కుమార్తె సునీతా రెడ్డి గురించి దుష్ప్రచారం చేస్తున్నారు. సునీతా రెడ్డి టీడీపీ మనిషి అయితే, అవినాష్ రెడ్డి కూడా టీడీపీ మనిషే. వైఎస్ షర్మిల కూడా టీడీపీ మనిషే. వైఎస్ విజయమ్మ, భారతి.. అంతెందుకు వైఎస్ జగన్ మోహన్ రెడ్డి కూడా టీడీపీ మనిషే..’ అంటూ చంద్రబాబు సెటైర్లేసేశారు.

ఇది ఆషామాషీ ర్యాగింగ్ కాదు. దీనికి సమాధానం చెప్పడం వైసీపీ నేతలెవరివల్లా కావడంలేదు. ఏమని సమాధానం చెప్పగలరు.? ఏమో, రేప్పొద్దున్న షర్మిల కూడా టీడీపీ మనిషేనని వైసీపీ ఆరోపించినా ఆశ్చర్యపోవాల్సిన పనిలేదు. సునీతారెడ్డి, షర్మిల.. విజయమ్మ, భారతి.. ఎవరి మీదనైనా తమ రాజకీయ అవసరాలకు తగ్గట్టుగా ఆరోపణలు చేయడం వైసీపీకే చెల్లుతుంది మరి.