వైఎస్ షర్మిల పార్టీకి చిక్కులు..! ఎన్నికల సంఘం తేల్చింది ఇదే..

తెలంగాణలో వైఎస్ షర్మిల కొత్త రాజకీయ పార్టీని స్థాపించిన విషయం తెలిసిందే. ఆ పార్టీకి వైయస్సార్ తెలంగాణ పార్టీ అని అమె ప్రకటించారు. అయితే.. షర్మిలకు భారత ఎన్నికల కమిషన్ షాక్ ఇచ్చింది. ఆ పార్టీని రిజిస్ట్రేషన్ చేయలేదని స్పష్టం చేసింది. అన్న వైఎస్ఆర్ కాంగ్రెస్ పార్టీ అభ్యంతరం మేరకు షర్మిల పార్టీ రిజిస్ట్రేషన్ నిలుపుదల చేసినట్లు వెల్లడించింది.

అన్న వైఎస్ఆర్ కాంగ్రెస్ పార్టీ జాతీయ అధ్యక్షుడు మహబూబ్ బాషా సమాచార హక్కు చట్టం ద్వారా కోరిన సమాచారానికి భారత ఎన్నికల సంఘం ఇచ్చిన సమాచారంతో ఈ విషయం వెలుగులోకి వచ్చింది. ఈ సందర్భంగా ఆయన మాట్లాడుతూ.. వైయస్ షర్మిల పార్టీని రిజిష్టర్ కాలేదని, మరికొన్ని ఇతర పేర్లు సూచించాలని షర్మిలకు ఎన్నికల కమిషన్ లేఖ రాసిందని తెలిపారు. వైయస్ షర్మిల స్థాపించిన పార్టీకి ఇతర పేర్లు సూచించాలని ఈ నెల 3న ఎన్నికల సంఘం లేఖ రాసినట్లు ఆయన తెలిపారు.