జస్ట్ ఆస్కింగ్: ‘మా’ కార్యాలయాన్ని మూసేశారా.?

మూవీ ఆర్టిస్ట్స్ అసోసియేషన్ ఎన్నికలు జరిగాయ్.. మంచు విష్ణు ప్యానెల్ గెలిచింది.. ప్రకాష్ రాజ్ ప్యానెల్ ఓడింది. ప్రశ్నిస్తానన్న ప్రకాష్ రాజ్ ఎక్కడ.? ఉద్ధరించేస్తానంటూ గద్దెనెక్కిన మంచు విష్ణు ఎక్కడ.? ‘మా’ కోసం కొత్త కార్యాలయ భవనాన్ని తానే నిర్మిస్తానని ఘనంగా ప్రకటించుకున్న మంచు విష్ణు, ఇప్పుడు ‘మా’ కార్యాలయానికే తాళం వేసేశారా.?

బోల్డన్ని ప్రశ్నలున్నాయ్.. సమాధానాలిచ్చేవారేరీ.? ‘మా’ కార్యాలయానికి తాళం వేసేశారంటూ గత కొద్దిరోజులుగా ‘మా’ సభ్యులు కొందరు ఆరోపిస్తున్నారు. ఉత్త ఆరోపణలు కాదు, ‘మా’ కార్యాలయానికి తాళం వేసేసి వున్న వైనాన్ని సెల్ఫీ వీడియోల్లో మరీ చిత్రీకరిస్తూ, వాటిని మీడియాకి అందిస్తున్నారు.

‘మా’ కార్యాలయాన్ని మూసెయ్యలేదంటూ ‘మా’ నుంచి ఒక్క అధికారిక ప్రకటనా ఇప్పటిదాకా రాకపోవడం గమనార్హం. ‘మా’ కార్యాలయంలో పనిచేసే సిబ్బందికి వేతనాలు కూడా చెల్లించడంలేదన్న ఆరోపణలున్నాయి. ‘మా’ ఎన్నికల నేపథ్యంలో, అవి పార్లమెంటు లేదా అసెంబ్లీ ఎన్నికల తరహాలో రచ్చ జరిగిన విషయం విదితమే.

అప్పుడే అనుకున్నారంతా.. ఈ రచ్చ ఎన్నికల వరకే, ఆ తర్వాత అంతా సైలెంటయిపోతారని. అదే జరుగుతోందిప్పుడు. ‘మా’ సభ్యుల కోసం మంచు విష్ణు అధ్యక్షుడి హోదాలో చాలా చేసేస్తున్నారంటూ అడపా దడపా మీడియాలో కథనాలొస్తున్నాయి. వాటిల్లో ఎంతవరకు నిజం.? అన్నదానిపైనా స్పష్టత లేదు.

‘మా’ని ఉద్ధరించేయడం సంగతి తర్వాత.. ముందైతే ‘మా’ కార్యాలయం మూతపడిందంటూ జరుగుతున్న ప్రచారంపై ‘మా’ అద్యక్షుడు మంచు విష్ణు స్పందించాల్సి వుంది. అసలు, ‘మా’ కార్యలయానికి తాళం ఎందుకు వేశారు.? సభ్యులకు ‘మా’ కార్యాలయం అందుబాటులో లేకపోతే, అసలు ‘మా’ ఎందుకు.?

‘మా’ కార్యాలయం కోసం కోట్లాది రూపాయలు ఖర్చవుతుందంటూ అప్పట్లో పెద్ద చర్చే జరిగింది. ‘మా’ కార్యాలయం అంటే సాదా సీదా భవనం కాదనీ, అదొక ఇంటెగ్రేటెడ్ భవనమనీ చెప్పుకొచ్చారు. ‘ఎంత ఖర్చయినా ఫర్వాలేదు.. నేను, నా కుటుంబం భరిస్తాం..’ అని చెప్పిన మంచు విష్ణు.. ఆ భవన నిర్మాణ పనులు ఎప్పుడు ప్రారంభమవుతాయో ప్రకటించడంతోపాటు, ఇప్పుడు వున్నపళంగా ‘మా’ కార్యాలయానికి పడ్డ తాళాన్ని తెరిస్తే మంచిదేమో.