రాజకీయాల్లో పరిణామాలు ఎప్పటికప్పుడు మారిపోతుంటాయి. ఎన్నికల వేళ ఈ పరిణామాలు అత్యంత వేగంగా మారడం చూస్తుంటాం. ఇప్పుడూ అదే జరుగుతోంది. కాంగ్రెస్ పార్టీకి వ్యతిరేకంగా పుట్టిన వైఎస్సార్ కాంగ్రెస్ పార్టీ, ఇప్పుడు పాత గూటికి చేరేలా కన్పిస్తోంది. సాక్షాత్తూ సోనియాగాంధీ, కేంద్రంలో బీజేపీ యేతర కూటమి కోసం వైఎస్సార్ కాంగ్రెస్ పార్టీ సాయాన్ని కోరుతున్నారు. మరోపక్క టీఆర్ఎస్ని కూడా తమ కూటమిలోకి రావాల్సిందిగా సోనియా ఆహ్వానించడంతో సమీకరణాలు ఒక్కసారిగా మారిపోతున్నట్లే కన్పిస్తోంది.
మే 23న సార్వత్రిక ఫలితాలు రానుండగా, సోనియాగాంధీ రాజకీయంగా చక్రం తిప్పేందుకు ప్రయత్నిస్తున్నారు. అయితే, బీజేపీతో కొంత సఖ్యతగా వున్న టీఆర్ఎస్, బీజేపీని కాదని కాంగ్రెస్ వైపుకు వెళ్ళడం కష్టమే. కానీ, ఇక్కడ వైఎస్సార్ కాంగ్రెస్ పార్టీకి కాంగ్రెస్ వైపుకు వెళ్ళడానికి ఓ అవకాశం గట్టిగా కన్పిస్తోంది. అదే ప్రత్యేక హోదా. ప్రత్యేక హోదా ఇస్తే ఎవరికైనా మద్దతునిస్తామని గతంలోనే వైఎస్ జగన్ ప్రకటించారు. ఆ ప్రత్యేక హోదా మీదనే తొలి సంతకం పెడతామని ఎఐసిసి అధ్యక్షుడు రాహుల్గాంధీ ఇప్పటికే స్పష్టం చేసిన విషయం విదితమే.
పరిణామాలు ఇలా మారతాయని ఊహించని తెలంగాణ రాష్ట్ర సమితి అధినేత, తెలంగాణ ముఖ్యమంత్రి కేసీఆర్ షాక్కి గురయ్యారట. వైఎస్ఆర్ కాంగ్రెస్ పార్టీ అధినేత వైఎస్ జగన్తో తాజా పరిణామాలపై చర్చించారట. ‘బీజేపీ ఎలాగూ ప్రత్యేక హోదా ఇవ్వదు. కాబట్టి, మేం ప్రత్యేక హోదా కోసం చేసే ఉద్యమంలో పోరాటమంతా బీజేపీతోనే చేయాల్సి వుంటుంది. ఫెడరల్ ఫ్రంట్కి పరిస్థితులు అనుకూలంగా లేవు. ఈ పరిస్థితుల్లో మా ముందున్న ఆప్షన్ కాంగ్రెస్ ఒక్కటే’ అని వైఎస్ జగన్, కేసీఆర్కి స్పష్టం చేశారనే ప్రచారమొకటి బయటకు వచ్చింది.
ఈ ప్రచారమే గనుక నిజమైతే, కాంగ్రెస్ పార్టీతో వైఎస్ జగన్మోహన్రెడ్డి కలవడం ఖాయమే అవుతుంది. కానీ, కాంగ్రెస్ నేతృత్వంలోని కూటమిలో తెలుగుదేశం పార్టీ బలమైన రాజకీయ శక్తిలా కన్పిస్తోంది. అదొక్కటే, వైఎస్సార్ కాంగ్రెస్ పార్టీ అధినేత వైఎస్ జగన్మోహన్రెడ్డికి పెద్ద ఇబ్బంది అని కూడా అంటున్నారు. కానీ, బీజేపీని ఎదుర్కొనే క్రమంలో వైసీపీని కూడా కలుపుకుపోతామనీ ఒకరిద్దరు టీడీపీ నేతలు మీడియా చర్చా కార్యక్రమాల్లో చెబుతుండడం గమనించాల్సిన విషయం.
రాజకీయాల్లో ఏదైనా సాధ్యమే. ఒకవేళ దేశంలో బీజేపీ వ్యతిరేక కూటమిలో కాంగ్రెస్తోపాటు వైసీపీ కూడా చేరితే అదో సరికొత్త రాజకీయ సమీకరణగా మారుతుంది. టీడీపీ ఎలాగూ ఈ కూటమిలోనే వుంటుంది. తప్పనిసరి పరిస్థితుల్లో టీఆర్ఎస్ కూడా ఇటువైపు వస్తుందా? ఫెడరల్ ఫ్రంట్ ఆలోచనలు ఫలించడంలేదు కాబట్టి, కేసీఆర్ అడుగులు కూడా కాంగ్రెస్ వైపుకే వుంటాయా? వేచి చూడాలిక.
418821 927648What might you recommend in regards to your publish that you just made some days ago? Any positive? 140041