వైఎస్సార్ కాంగ్రెస్ పార్టీకి యూ టర్న్ నామ సంవత్సరమిది.!

ఏం చెప్పారు.? ఏం చేస్తున్నారు.? ఏకైక రాజధాని అమరావతి దండగ.. మూడు రాజధానులే పండగన్నారు.. మూడు రాజధానుల చట్టం తెచ్చారు, దాన్ని వెనక్కి తీసుకున్నారు. శాసన మండలి ఖర్చు దండగ వ్యవహారమన్నారు. శాసన మండలిని రద్దు చేయడానికి తీర్మానం చేశారు. కానీ, ఆ శాసన మండలిలో మెజార్టీ వచ్చాక, శాసన మండలి రద్దు నిర్ణయాన్ని వెనక్కి తీసుకున్నారు.

మాట తప్పడు.. మడమ తిప్పడు.. ఇది వైఎస్ జగన్ మోహన్ రెడ్డి గురించి పదే పదే వైసీపీ నేతలు చెప్పే మాట. నిజానికి, ఇదొక నినాదంగా మారిపోయింది వైఎస్సార్సీపీకి. ఇప్పుడేమో, ‘మాట తప్పుతాడు.. మడమ తిప్పుతాడు..’ అనాలేమో. నిజానికి, మాట తప్పడం.. మడమ తిప్పడం.. అనేది ఇప్పటి మాట కాదు.

ఎంపీలు రాజీనామాలు చేస్తేనే, ప్రత్యేక హోదా వస్తుందన్నది ఒకప్పటి నినాదం. అధికారంలోకి వస్తూనే, ఆ నినాదానికి పాతరేశారు. ‘రాజీనామాలు చేస్తే, పార్లమెంటులో ఎవరు పోరాడతారు.?’ అని వైసీపీ ప్రశ్నిస్తోందిప్పుడు. అవినీతి ఆరోపణలున్న వ్యక్తులకు కీలక పదవులు కట్టబెట్టారు. టీటీడీలో శేఖర్ రెడ్డి నియామకం ఒకప్పుడు వైసీపీకి నచ్చని విషయం. కానీ, అధికారంలోకి వచ్చాక అదే మెచ్చిన విషయమైపోయింది.

చెప్పుకుంటూ పోతే చాలానే వున్నాయ్. ‘యూ టర్న్’ల సంఖ్య లెక్కేస్తే.. అది లెక్కలకు అందదన్నది నేటి మాట. అన్నిటిలోకీ పెద్ద యూ టర్న్.. అంటే, అది శాసన మండలి రద్దు వ్యవహారమే. ‘కేంద్రం నిర్ణయం తీసుకోవడంలో ఆలస్యం చేసింది కాబట్టి..’ అంటూ కుంటి సాకు చెబుతోందిప్పుడు వైసీపీ.

కానీ, శాసన మండలి రద్దుకు అసెంబ్లీలో తీర్మానం చేసి, శాసన మండలి సభ్యత్వం విషయమై హామీలు ఇవ్వడంతోనే.. వైసీపీ డొల్లతనం బయటపడిపోయింది. మూడు రాజధానుల విషయంలో ఇంకా వైసీపీ, లేనిపోని డప్పాలు కొడుతూనే వుంది.

‘అబ్బే, మేం వెనక్కి మళ్ళలేదు.. మెరుగైన బిల్లు తీసుకొస్తాం..’ అని వైసీపీ చెబుతోంది. ఎలా.? గడచిన రెండున్నరేళ్ళలో రాజధాని పేరుతో అమరావతిలో ఒక్క అదనపు నిర్మాణమైనా జరిగిందా.? జరగలేదాయె. మరెలా విశాఖలో అయినా, కర్నూలులో అయినా ఎగ్జిక్యూటివ్ క్యాపిటల్, జ్యుడీషియల్ క్యాపిటల్ పేర్లతో అభివృద్ధి చేసేస్తారు.?