తిరుపతి బై పోల్: బీజేపీకి జనసైనికులు సహకరిస్తారా.?

దుబ్బాక, గ్రేటర్ హైద్రాబాద్ ఎన్నికల పరిస్థితి వేరు. తెలంగాణలో బీజేపీకి అగ్రెసివ్ నేచర్ వున్న నాయకుల బలం వుంది. అదే సమయంలో, తెలంగాణలో ‘హిందుత్వ’ నినాదం సహా, అనేక సానుకూలతలు బీజేపీకి వున్నాయి. తెలంగాణ నుంచి బీజేపీకి ఓ కేంద్ర మంత్రి, పలువురు ముఖ్య నేతలూ వున్నారు. అసెంబ్లీ ఎన్నికల్లో ఒకే ఒక్క ఎమ్మెల్యే బీజేపీ నుంచి అంతకు ముందు గెలిచినా, లోక్‌సభ ఎన్నికల్లో బీజేపీ సత్తా చాటింది. ఇన్ని సానుకూలతలు తెలంగాణలో వుండబట్టే బీజేపీ, దుబ్బాక సహా గ్రేటర్ ఎన్నికల్లో అధికార పార్టీకి ధీటుగా నిలబడగలిగింది. దుబ్బాకలో అధికార టీఆర్ఎస్‌ని ఓడించింది.

మరి, ఆంధ్రపదేశ్ మాటేమిటి.? తిరుపతి ఉప ఎన్నికలో గెలవడానికి బీజేపీ వద్ద వున్న బలమేంటి.? ఏపీ బీజేపీలో వున్న చాలామంది నేతలపై ‘వైసీపీ కోవర్టులు’ అనే ముద్ర వుంది. ఇంకొందరిపై ‘టీడీపీ కోవర్టులు’ అన్న ముద్ర కూడా లేకపోలేదు. ‘జనసేన మద్దతుదారులు’ అనే ఇమేజ్ కూడా కొందరికి వుంది. ఇంతటి సంక్లిష్టత కలిగిన బీజేపీ, తిరుపతి ఉప ఎన్నికలో అభ్యర్థిని నిలబెట్టాలనే పట్టుదలకు పోవడం చాలామందిని ఆశ్చర్యపరిచింది.

అది సరే, మిత్రపక్షం జనసేన.. పూర్తిస్థాయిలో బీజేపీకి సహకరిస్తుందా.? అన్నది ఇంకో కీలకమైన ప్రశ్న. జనసేనను మొదటి నుంచీ బీజేపీ చిన్నచూపు చూస్తూనే వుంది. అమరావతి విషయంలో కావొచ్చు, విశాఖ ఉక్కు విషయంలో కావొచ్చు, మరో విషయంలో కావొచ్చు.. మిత్రపక్షం జనసేన కంటే కూడా వైసీపీ మీదనే కొందరు బీజేపీ నేతలు ఎక్కువ అభిమానం చూపిస్తూ వస్తున్నారు. ఒక్కోసారి బీజేపీ ప్రయోజనాల్ని పక్కన పెట్టి, వైసీపీ తరఫున వకాల్తా పుచ్చుకుంటున్నారు కొందరు బీజేపీ నేతలు. ఇవన్నీ, జనసైనికులకు ఒకింత అసహనం కలిగించిన మాట వాస్తవం.

పైగా, బీజేపీ కంటే ఎక్కువ బలం వున్న జనసేనకు తిరుపతి టిక్కెట్ వదిలేయకపోవడంపైనా జనసైనికుల్లో అసహనం వుంది. అదంతా సోషల్ మీడియా వేదికగా వ్యక్తమవుతూనే వుంది. సో, తిరుపతి ఉప ఎన్నికకు సంబంధించి బీజేపీకి, జనసేన నాయకులు సహకరించొచ్చేమోగానీ, జనసైనికులు సహకరించకపోవచ్చు.