ఇదేమి చోద్యం! రిపబ్లిక్, బీజేపీ ఛానల్ అని సజ్జలకు తెలియదా.?

వైసీపీ ముఖ్య నేత, ప్రభుత్వ సలహాదారు సజ్జల రామకృష్ణారెడ్డి.. అంటే, వైసీపీ అధినేత వైఎస్ జగన్ మోహన్ రెడ్డికి ‘కుడి భుజం’ కింద లెక్క. వైఎస్ జగన్ కోటరీ.. (అది పార్టీ పరంగా అయినా, ప్రభుత్వం పరంగా అయినా..) గురించి మాట్లాడాల్సి వస్తే, అందులో ముందు వరుసలో సజ్జల రామకృష్ణారెడ్డి పేరు వినిపిస్తుంది. అలాంటి సజ్జల రామకృష్ణారెడ్డి వార్నింగ్ ఇచ్చారంటే అంతే సంగతులు. ఈసారి ఆయన వార్నింగ్ ఇచ్చింది ఏకంగా జాతీయ మీడియాకి చెందిన రిపబ్లిక్ అనే న్యూస్ ఛానల్‌కి కావడం గమనార్హం.

రిపబ్లిక్ ఛానల్ అధినేత అర్నాబ్ గోస్వామిపై సజ్జల రామకృష్ణారెడ్డి అసహనం వ్యక్తం చేశారు, ఆర్నాబ్‌కి అల్టిమేటం కూడా జారీ చేసేశారు. కారణం, వైసీపీకి వ్యతిరేకంగా అందులో కథనాలు వస్తున్నాయట. వైసీపీలో లుకలుకలు.. అంటూ ఓ కథనం తాజాగా రిపబ్లిక్‌లో ప్రసారమయ్యింది. దాంతో, సహజంగానే వైసీపీకి కోపమొచ్చింది.

అంతా బాగానే వుందిగానీ, రిపబ్లిక్‌లో కథనాలొస్తే, చంద్రబాబుని సజ్జల విమర్శించడమేంటి.? రిపబ్లిక్ టీవీ, బీజేపీ కనుసన్నల్లో నడుస్తుందని సజ్జలకు తెలియదని ఎలా అనుకోగలం.? కానీ, ఏం చేస్తారు.. బీజేపీని విమర్శించేందుకు సజ్జలకు ‘అధిష్టానం నుంచి అనుమతి’ లేదు. ఒకవేళ వున్నా, బీజేపీని విమర్శిస్తే ఏమవుతుందో సజ్జలకీ బాగా తెలుసు. అద్గదీ అసలు సంగతి.

చంద్రబాబుని విమర్శించేందుకు ఫుల్ రైట్స్ సజ్జలకు వున్నాయి గనుక, ఎక్కడ చీమ చిటుక్కుమన్నా అది చంద్రబాబు కుట్రలేనని అనడం సజ్జలకు చాలా చాలా తేలిక. ఇక, రిపబ్లిక్ టీవీలో వైసీపీకి వ్యతిరేకంగా కథనాలు వస్తున్నాయంటే ఒకింత ఆలోచించాల్సిన విషయమే ఇది. బీజేపీ, ఏపీ మీద.. అందునా వైసీపీ మీదా స్పెషల్ ఫోకస్ పెట్టిందనేది సుస్పష్టమిక్కడ.

ప్రస్తుతం పలు రాష్ట్రాల్లో ఎన్నికలు జరుగుతున్న దరిమిలా, ఆ వ్యవహారం పూర్తయ్యాక, ఏపీలో అధికార పార్టీ సంగతేంటో బీజేపీ చూడబోతోందన్నమాట. ఈ ప్రక్రియలో భాగంగానే ముందస్తుగా తమ అనుకూల ఛానల్ రిపబ్లిక్ ద్వారా, ఏపీలోని అధికార పార్టీలో సెగ రాజేసింది రిపబ్లిక్. అదీ అసలు విషయం.