అమర్ రాజా కాలుష్యం.. దివీస్ పరిమళం.. ఏందీ వైపరీత్యం.?

అమర్ రాజా పరిశ్రమకు వ్యతిరేకంగా ఆందోళనలు, ఉద్యమాలు జరగలేదు. కానీ, ఆ పరిశ్రమని రాష్ట్రం నుంచి వెల్లగొడుతోంది వైఎస్ జగన్ ప్రభుత్వం. దివీస్ పరిశ్రమకు వ్యతిరేకంగా ఆందోళనలు, ఉద్యమాలు జరిగాయి. కానీ, దివీస్ పరిశ్రమ పట్ల జగన్ సర్కార్ ప్రత్యేకమైన శ్రద్ధ చూపుతోంది. పైగా, ప్రతిపక్ష నేతగా వున్న సమయంలో దివీస్ పరిశ్రమను పెట్టనీయబోమంటూ నినదించిన వైఎస్ జగన్, ముఖ్యమంత్రి అయ్యాక.. ఆ పరిశ్రమ కొత్త ప్లాంట్ ప్రారంభోత్సవానికి వెళ్ళేందుకు సన్నాహాలు చేసుకున్నారు. కానీ, వెల్లువెత్తిన ప్రజా వ్యతిరేకత నేపథ్యంలో దాన్ని విరమించుకున్నారు. అసలేం జరుగుతోంది రాష్ట్రంలో.?

ఏ పరిశ్రమ అయినా కాలుష్యాన్నే ఇస్తుంది.. సుగంధ పరిమళాల్ని అయితే ఇవ్వదు. చిన్న పరిశ్రమ అయినా, పెద్ద పరిశ్రమ అయినా వెద జల్లేది కాలుష్యమే.. ఇది జగమెరిగిన సత్యం. ‘మేమే అమర్ రాజా పరిశ్రమని పొమ్మన్నాం..’ అని ప్రభుత్వ పెద్దలు ఘనంగా చెప్పుకున్నారు. అంతలోనే, ‘తూచ్, కాలుష్య కారకాల్ని తగ్గించుకుని, పరిశ్రమను ఎంచక్కా నడుపుకోవచ్చు.. పరిశ్రమ తరలి వెళ్ళాలని మేం కోరుకోవడంలేదు..’ అంటూ వివరణ ఇచ్చుకున్నారు అధికార పార్టీ పెద్దలు.

ఇక్కడ విషయం చాలా స్పష్టంగా కనిపిస్తోంది. ప్రతిపక్షంపై రాజకీయ కుట్రలో భాగంగానే, అధికార పక్షం.. తన శక్తి యుక్తులన్నిటినీ ప్రయోగించి, రాష్ట్రానికి అన్యాయం చేస్తోంది. ఉత్తరాంధ్రలో వైసీపీ ఎంపీ విజయసాయిరెడ్డి బంధువులకు చెందిన పలు పరిశ్రమల నుంచి కాలుష్యం అత్యంత భయంకరంగా ప్రజల మీద దాడి చేస్తోందన్న విమర్శలు గత కొంతకాలంగా వినిపిస్తున్నాయి. అలాంటి పరిశ్రమల జోలికి పొల్యూషన్ బోర్డ్ కన్నెత్తి కూడా చూడటంలేదాయె. కాలుష్యం పేరుతో మూసెయ్యాలంటే, రాష్ట్రంలో ఒక్కటంటే ఒక్క పరిశ్రమ కూడా వుండబోదేమో.. అన్న వాదనలూ లేకపోలేదు.

వైఎస్ జగన్ మోహన్ రెడ్డి అధికారంలోకి వచ్చాక, నిర్మాణాల్ని కూల్చెయ్యడమో.. పరిశ్రమల్ని, పెట్టుబడిదారుల్ని వెల్లగొట్టడమో జరిగింది తప్ప.. కొత్తగా పరిశ్రమలు వచ్చే పరిస్థితులుగానీ, కొత్తగా పెట్టుబడులు వచ్చే వాతావరణంగానీ ఎందుకు కనిపించడంలేదన్న ప్రశ్నకు సమాధానం చెప్పేదెవరు.?

టీడీపీ మీద రాజకీయ వైరం వుంటే.. అది వేరే చర్చ. దానికెలాగూ ఏసీబీ, సీఐడీ వంటి వాటి ద్వారా కేసులు పెట్టించడం, అరెస్టులు చేయించడం.. వంటివి జరుగుతున్నాయి. రాష్ట్ర ప్రజల మీదా, రాష్ట్రం మీదా ఎందుకు కత్తి గట్టడం.? అన్నది రాజకీయ పరిశీలకుల ఆవేదన. ఆంధ్రప్రదేశ్‌లో నడుస్తున్న ఈ చిత్ర విచిత్రమైన పాలన, పొరుగు రాష్ట్రాలకు మాత్రం వరంగా మారుతోంది.