అమెరికా ‘ఇమ్మిగ్రేషన్‌’ ఆపేస్తే ఎవరికి నష్టం.?

కరోనా వైరస్‌ మహమ్మారిగా మారుతోందని తెలిసీ అమెరికా అధ్యక్షుడు డోనాల్డ్‌ ట్రంప్‌ వెటకారాలు చేయడం చూశాం. ‘అమెరికాని కరోనా వైరస్‌ ఏమీ చేయలేదు..’ అంటూ మొదట్లో అహంకారం ప్రదర్శించిన ట్రంప్‌, ఆ తర్వాత కరోనా విలయం చూసి బెంబేలెత్తిన విషయం విదితమే. ‘భారతదేశం గనుక హైడ్రాక్సీ క్లోరోక్విన్‌ని మాకు ఇవ్వకపోతే, ఆ తర్వాత పరిణామాలు ఇంకోలా వుంటాయి..’ అంటూ మేకపోతు గాంభీర్యం ప్రదర్శించడం ట్రంప్‌కే చెల్లింది.

ఆ సంగతి పక్కన పెడితే, కరోనా దెబ్బకి అగ్రరాజ్యం చిగురుటాకులా వణుకుతోంది. వేలాది మరణాలు అమెరికాలో సంభవించాయి. అగ్రరాజ్యానికీ ఆర్థికంగా కోలుకోలేని దెబ్బ తగిలింది కరోనా వైరస్‌ కారణంగా. ఈ నేపథ్యంలోనే ‘దిద్దుబాటు’ చర్యలకు దిగిన అమెరికా అధ్యక్షుడు డోనాల్డ్‌ ట్రంప్‌, ‘ఇమ్మిగ్రేషన్‌’కి తాత్కాలికంగా ‘బ్రేక్‌’ వేశారు. ‘అమెరికన్లు సంక్షోభంలో వున్నారు.. వారికి ఉపాధి కల్పించాలంటే, ఇమ్మిగ్రెంట్స్‌కి షాక్‌ ఇవ్వక తప్పదు..’ అంటూ ట్రంప్‌ ప్రకటించిన విషయం విదితమే.

అయితే, కరోనా వైరస్‌కి ముందు.. కరోనా వైరస్‌ తర్వాత.. పరిస్థితులకు స్పష్టమైన తేడా కన్పిస్తోంది. ‘విదేశీ మోజు’ ఇప్పుడు చాలా దేశాలకు తగ్గిపోయింది. ప్రధానంగా మన దేశంలో ‘అమెరికా మోజు’ ఇకపై వుండదా.? అన్న చర్చ జరుగుతోందంటే పరిస్థితులు ఎలా వున్నాయో అర్థం చేసుకోవచ్చు. ‘ఇకపై ఎవరూ అమెరికా వెళ్ళాలనే ఆలోచన చేయరు’ అనడం సబబు కాదుగానీ, అమెరికా సహా విదేశాల్లో ఉపాధి పొందాలనో, అక్కడే స్థిరపడాలనో ఆలోచన చేసేవారి సంఖ్య మాత్రం ఖచ్చితంగా చెప్పొచ్చు.

‘ఇమ్మిగ్రెంట్స్‌ని తాత్కాలికంగా నిలిపేయడం’ అనేది అర్థం పర్థం లేని చర్య.. అని అమెరికాలోని ఆర్థిక వేత్తలే చెబుతున్నారు. అగ్రరాజ్యానికి ఇమ్మిగ్రెంట్స్‌ ద్వారా అందుతున్న ఆర్థిక ఊతం అంతా ఇంతా కాదు. ఆ ఇమ్మిగ్రెంట్స్‌ లేకపోతే, అమెరికా ప్రపంచం దృష్టిలో పలచనైపోతుందనీ, ముందు అమెరికా అత్యంత దారుణమైన ఆర్థిక సమస్యలు ఎదుర్కొనే ప్రమాదం లేకపోలేదని నిపుణులు అభిప్రాయపడుతున్నారు. సంచలన నిర్ణయాలు తీసుకోవడం, వెంటనే సడలింపులు ఇవ్వడం డోనాల్డ్‌ ట్రంప్‌కి కొత్తేమీ కాదనుకోండి.. అది వేరే విషయం.