‘గాడ్ ఫాదర్’ ప్రీ రిలీజ్ ఈవెంట్‌కి పవన్ వెళితే ఏమవుతుంది.?

మెగాస్టార్ చిరంజీవి తాజా చిత్రం ‘గాడ్ ఫాదర్’ ప్రేక్షకుల ముందుకొస్తోంది. అక్టోబర్ 5న ఈ సినిమా విడుదల కాబోతోంది. మలయాళ సినిమా ‘లూసిఫర్’కి ఇది తెలుగు రీమేక్. మోహన్ రాజా దర్శకత్వంలో ఈ సినిమా రూపొందిన సంగతి తెలిసిందే.

తొలిసారిగా మెగాస్టార్ చిరంజీవి, బాలీవుడ్ హీరో సల్మాన్ ఖాన్ కలిసి నటిస్తున్న సినిమా ‘గాడ్ ఫాదర్’. ఇదే తొలి తెలుగు సినిమా సల్మాన్ ఖాన్‌కి. ‘సల్మాన్ ఖాన్‌నే ఎందుకు తీసుకున్నారు.? ఆ అవకాశం నాకు ఇవ్వొచ్చు కదా.?’ అని ఆ మధ్య మరో బాలీవుడ్ నటుడు అమీర్ ఖాన్ అడిగాడంటే, ‘గాడ్ ఫాదర్’ సినిమాలో సల్మాన్ ఖాన్ పోషిస్తున్న పాత్ర ఎంత ప్రత్యేకమైనదో అర్థమవుతుంది.

‘లూసిఫర్’ సినిమా తెలుగు వెర్షన్ కూడా ఓటీటీలో అందుబాటులో వున్నా, ‘గాడ్ ఫాదర్’ మీద అంచనాలు భారీగానే వున్నాయి. తొలుత ఈ సినిమాలో పవన్ కళ్యాణ్ నటించొచ్చన్న ఊహాగానాలు వినిపించాయిగానీ, అవన్నీ జస్ట్ పుకార్లుగానే మిగిలిపోయాయ్.

కాగా, ‘గాడ్ ఫాదర్’ ప్రీ రిలీజ్ ఈవెంట్ అనంతపురంలో నిర్వహించేందుకు సన్నాహాలు చేస్తున్నారు. ఈ వేడుకకు ముఖ్య అతిథిగా పవన్ కళ్యాణ్ హాజరు కాబోతున్నారన్నది ఓ ప్రచారం. అయితే, ఈ విషయమై సస్పెన్స్ కొనసాగుతోంది. పవన్ కళ్యాణ్ అందుబాటులో వుండకపోవచ్చనీ, చిరంజీవి మాత్రం పవన్ కళ్యాణ్ ఈ వేడుకకు హాజరు కావాలని కోరుకుంటున్నారనీ గాసిప్స్ వినిపిస్తున్నాయి.

చిరంజీవి కోరుకుంటే పవన్ కళ్యాణ్ వచ్చి తీరతారు. ఇందులో ఇంకో మాటకు తావు లేదు. అయితే, పవన్ రావడం వల్ల ‘గాడ్ ఫాదర్’ సినిమాపై రాజకీయ విషం చిమ్మే అవకాశం వుందన్న చర్చ సర్వత్రా జరుగుతోంది. చిరంజీవి మీద ప్రేమ నటిస్తోన్న వైసీపీ, పవన్ కళ్యాణ్ మీద విషం చిమ్ముతోన్న సంగతి తెలిసిందే. చిరంజీవి, పవన్ కళ్యాణ్ ఒకే వేదిక మీద కనిపిస్తే, వైసీపీ శ్రేణులు జీర్ణించుకోలేవు.

ఈ క్రమంలో ‘గాడ్ ఫాదర్’ సినిమా మీద విపరీతమైన నెగెటివిటీ ప్రచారం చేసే అవకాశాల్లేకపోలేదు. ‘చిరంజీవిని పవన్ కళ్యాణ్ వెన్నుపోటు పొడిచారు..’ అంటూ అర్థం పర్థం లేని వెకిలి వ్యాఖ్యలు చేస్తున్నారు వైసీపీ నేతలు. ఈ క్రమంలో అన్నదమ్ములిద్దరూ ఒకే వేదికపై కనిపిస్తే, వైసీపీ నోళ్ళు మూతపడతాయన్నది మెగాభిమానుల వాదన.

అధికారం చేతిలో పెట్టుకుని, సినిమాల మీద ప్రతాపం చూపుతున్న వైసీపీ, ‘గాడ్ ఫాదర్’ మీద సైతం నిర్దాక్షణ్యంగా పైత్యం ప్రదర్శించే అవకాశం లేకపోలేదు. మరి, ‘గాడ్ ఫాదర్’ ప్రీ రిలీజ్ ఈవెంట్ ఎలా జరగబోతోంది.? పవన్ కళ్యాణ్ వెళతారా.? లేదా.? వేచి చూడాల్సిందే.