మేం జయించాం.. మేం చంపుతాం: వైరల్ గా మారిన పోస్టర్

శత్రువు శత్రువు మిత్రుడు అనేది ఎక్కడైనా వర్తిస్తుంది. భారత్-చైనా సరిహద్దుల్లో జరిగిన ఘర్షణల్లో భారత సైనికుల చేతిలో చైనా సైనికులు చావుదెబ్బ తిన్నారనే వార్త మనకే కాకుండా మరో రెండు దేశాలకూ సంతోషం కలిగించింది. చైనా పెత్తనాన్ని సహించలేని హాంకాంగ్ అందులో ఒకటైతే.. చైనా పొరుగునే ఉన్న తైవాన్ మరొకటి. లడఖ్ ఘర్షణల్లో 43 మంది చైనా సైనికులు మరణించి ఉంటారనే వార్త తైవాన్ కు చాలా ఆనందం కలిగించింది.

ఈ నేపథ్యంలో తైవాన్ కు చెందిన ఎల్ఐహెచ్ కేజీ అనే సోషల్ మీడియా సైటులో హో సా లై అనే వ్యక్తి పంపించిన పోస్టర్ ఒకటి ప్రచురితమైంది. అందులో శ్రీరాముడు డ్రాగన్ పైకి విల్లు ఎక్కుపెట్టినట్టుగా ఉంది. దానిపై ‘మేం జయించాం.. మేం చంపుతాం’ అనే క్యాప్షన్ కూడా ఉంది. ఇది తైవానీలను విపరీతంగా ఆకర్షించింది. చైనాకు హెచ్చరికలా ఉన్న ఈ పోస్టర్ ను వారు విపరీతంగా షేర్ చేయడంతో బాగా వైరల్ అయింది.

అలాగే మిల్క్ టీ అలయెన్స్ ట్విట్టర్ పోస్టులను కూడా ఈ సైటు ప్రచురించింది. ఆసియాలో పాలతో తయారు చేసిన టీ తాగే దేశాల కూటమికి సంకేతంగా సోషల్ మీడియాలో మిల్క్ టీ అలయెన్స్ ను కొందరు నెటిజన్లు ఏర్పాటు చేశారు. ఇందులో భారత్ తోపాటు హాంకాంగ్, తైవాన్, థాయ్ లాండ్ ఉన్నాయి. ఈ దేశాలలో పాలతో తయారుచేసిన టీ తాగుతారు. అయితే, చైనాలో పాల టీ తాగేవారు కాదు. ఇటీవల కాలంలో అక్కడ కూడా పాల టీ తాగేవారు క్రమంగా పెరుగుతున్నారు.

ఇక తమపై చైనా పెత్తనాన్ని హాంకాంగ్ సహించడంలేదు. వారు స్వతంత్రంగా ఉండటానికి ఆందోళనలు చేస్తున్నారు. చైనా వాటిని ఎంతగా అణచివేస్తున్నా.. ప్రజలు మాత్రం వెనక్కి తగ్గడంలేదు. అలాగే తైవాన్ ను కూడా తమ భాభాగంగానే చైనా క్లెయిమ్ చేసుకుంటూ ఉంటుంది.

నిజానికి చైనాకు సరిహద్దుల్లో ఉన్న దేశాలతోనే కాదు.. ఎక్కడో సుదూరంగా ఉన్న దేశాలతోనూ గొడవలున్నాయి. డ్రాగన్ కంట్రీ 14 దేశాలతో సరిహద్దులు పంచుకుంటుండగా.. ఏకంగా 23 దేశాలతో గొడవలు ఉండటం ఆ దేశ సామ్రాజ్య కాంక్షకు నిదర్శనం. ఈ నేపథ్యంలో భారత పక్షానే తాము ఉన్నామంటూ తైవానీలు సోషల్ మీడియాలో ఈ పోస్టర్ షేర్ చేస్తున్నారు.

మనదేశంలో కరోనా వైరస్ పై పోరుకు తైవాన్ పది లక్షల మాస్కులు విరాళంగా పంపించింది. మన పొరుగు దేశాలను చైనా ఎలా తన వైపు తిప్పుకుంటుందో.. మనం కూడా చైనా పొరుగు దేశాలతో సఖ్యత పెంచుకోవాల్సిన అవసరం ఉంది.