జగన్‌.. గెలిచెన్‌: గ్రామ, వార్డు సచివాలయ వ్యవస్థ ప్రారంభం!

గ్రామ, వార్డు సచివాలయ వ్యవస్థ ఆంధ్రప్రదేశ్‌లో ప్రారంభమయ్యింది. మహాత్మాగాంధీ జయంతి నాడు గ్రామ, వార్డు సచివాలయ వ్యవస్థని ముఖ్యమంత్రి వైఎస్‌ జగన్‌మోహన్‌రెడ్డి, తూర్పుగోదావరి జిల్లాలో ప్రారంభించారు. మొదటి నుంచీ ఈ వ్యవస్థపై చాలా ఆనుమానాలు వ్యక్తమవుతున్నా.. వార్డు, గ్రామ సచివాలయ ఉద్యోగాలకు సంబంధించి ఎన్నో వివాదాలు తెరపైకొచ్చినా, ముఖ్యమంత్రి వైఎస్‌ జగన్‌ ఎక్కడా వెనుకంజ వేయలేదు.

పరీక్షల నిర్వహణలో కుంభకోణం జరిగిందంటూ ఆరోపణలు వెల్లువెత్తినా, జగన్‌ సర్కార్‌ లైట్‌ తీసుకుంది. మరోపక్క, ఏపీపీఎస్‌సీ ఉన్నతాధికారిని ఈ వ్యవహారానికి సంబంధించి బలిపశువుని చేసినట్లు తెలుస్తోంది. వ్యవహారం బయటకు పొక్కకుండా సదరు అధికారిపై బదిలీ వేటు వేసి చేతులు దులుపుకుందట వైఎస్‌ జగన్‌ సర్కార్‌.

ఇదిలా వుంటే, కొత్తగా అధికారంలోకి వచ్చాక కేవలం 120 రోజుల్లోనే లక్షకు పైగా ప్రభుత్వ ఉద్యోగాలు కల్పించడమంటే ఆషామాషీ వ్యవహారం కాదు. ఆ లెక్కన వైఎస్‌ జగన్‌ సర్కార్‌ చరిత్ర సృష్టించిందనే చెప్పుకోవాలి. అయినాగానీ, గ్రామ – వార్డు సచివాలయ ఉద్యోగుల విధులు ఏంటి.? అన్నదానిపై పూర్తి స్పష్టత లేదు. ఇప్పటికే మండల, గ్రామ, వార్డు వ్యవస్థలున్నాయి. ఆ వ్యవస్థలే సక్రమంగా పనిచేయని పరిస్థితి. కొన్ని వ్యవస్థల్ని పూర్తిగా తొలగిస్తారా.? లేదంటే, వాటికి సమాంతరంగా కొత్త వ్యవస్థలు పెత్తనం చెలాయిస్తాయా.? అన్నదానిపై భిన్నాభిప్రాయాలు వ్యక్తమవుతున్నాయి.

మరోపక్క, అసలే ఆంధ్రప్రదేశ్‌ ఆర్థిక పరిస్థితి అంతంతమాత్రంగా వుంది. ఇలాంటి సమయంలో కుప్పలు తెప్పలుగా ప్రభుత్వ ఉద్యోగాలంటే, ఆ తర్వాత ఆర్థిక పరిస్థితి ఏమవుతుదో ఏమోనన్న ఆందోళనలూ లేకపోలేదు. ఏదిఏమైనా, పబ్లిసిటీకి పనికొచ్చే ఏ విషయంలోనూ వైఎస్‌ జగన్‌ సర్కార్‌ వెనక్కి తగ్గడంలేదు. సొమ్ము ఒకడిది.. సోకు ఇంకొకడిది.. అన్న చందాన, ప్రజల సొమ్ముతో నిర్మించే వార్డు, గ్రామ సచివాలయాలకు వైఎస్సార్‌ కాంగ్రెస్‌ పార్టీ జెండా రంగులు అద్దడం కూడా విమర్శలకు తావిస్తోంది.

గతంలో టీడీపీ అదే చేసింది, ఇప్పుడు వైసీపీ కూడా అదే చేస్తోందని సరిపెట్టుకోవాలా.? అలా సరిపెట్టుకోవాల్సి వస్తే రాష్ట్ర ప్రజల పరిస్థితి పెనం మీద నుంచి పొయ్యిలో పడ్డట్టే కదా.!