అక్కడ అందరూ కవలలే..ఆ గ్రామం గురించి అందరూ తెలుసుకోవాల్సిందే

ఎవరికైనా కవల పిల్లలు పుడితే వారి సంతోషానికి అవధులు ఉండవ్. ఒకే రూపురేఖలు కలిగిన ఇద్దరు పిల్లలు ఒకే ఇంట్లో అల్లరి చేస్తుంటే వచ్చే మజాయే వేరు. పైగా కవల పిల్లలు పుట్టడం అనేది చాలా అరుదైన అంశం కావడంతో ఎక్కడైనా ట్విన్స్ ఉంటే వారిని ప్రత్యేకంగా చూస్తుంటారు. ఒక ఊళ్లో ఒకరికో, ఇద్దరికో మాత్రమే ఇలా కవలలు పుడుతుంటారు. అదే ఊరు మొత్తం కవలలతో నిండిపోతే, ఏ ఇంటికి వెళ్లినా ట్విన్స్ తారసపడితే ఎలా ఉంటుంది? ఆలోచిస్తేనే గమ్మత్తుగా అనిపిస్తోంది కదూ? దేవుడి సొంత భూమిగా పేరు పొందిన కేరళలోని కోదిన్హి అనే గ్రామం వెళితే మీరు తికమక పడటం ఖాయం.

ట్విట్ టౌన్ గా పేరు పొందిన ఈ గ్రామంలో ఎటు చూసినా కవలలే దర్శనమిస్తారు. ఏ వీధికి వెళ్లినా రాముడూ, భీముడూ హాయ్ అంటారు. ఏ ఇంటికి వెళ్లినా సీత, గీత తారసపడతారు. దాదాపు 2వేల కుటుంబాలు నివాసం ఉంటున్న ఈ గ్రామంలో ఏకంగా 400 మంది కవలలు ఉన్నారు. మన దేశంలో ప్రతి వెయ్యి జననాల్లో కేవలం 9 మంది మాత్రమే కవలలు ఉంటుండగా… కోదిన్హి విషయానికొచ్చేసరికి ప్రతి వెయ్యి జననాల్లో 45 మంది కవలలే ఉంటున్నారు. ఇది ప్రపంచంలోని ఏ దేశంలోని సగటు కంటే కూడా చాలా ఎక్కువ. ఏ ఊళ్లోనైనా ఒకరు లేదా ఇద్దరికి కవలలు పుట్టే అవకాశం ఉంటుంది. కానీ ఇలా ఊరు మొత్తం కవలలు పుట్టడం అనేది నిజంగా వింతే.

ఈ నేపథ్యంలో ఇందుక గల కారణాలు తెలుసుకునేందుకు దాదాపు రెండు దశాబ్దాలుగా పరిశోధనలు చేస్తూనే ఉన్నారు. దేశీయ పరిశోధకులతోపాటు అంతర్జాతీయ బృందం కూడా ఈ విషయంలో పరిశోధనలు సాగించింది. ఈ గ్రామస్తులు తినే ఆహారం లేదా తాగే నీళ్లలోనే ఏమైనా ఉన్నాయనే అంశం దగ్గర నుంచి జన్యుపరమైన లక్షణాల కారణంగా ఇలా జరుగుతుందేమో అనే కోణం వరకు పలు విషయాల్లో అధ్యయనాలు చేశారు. కానీ చిన్న క్లూ కూడా దొరకలేదు. వియత్నాం, నైజీరియా, బ్రెజిల్ లో కూడా కొన్ని తెగల్లో ఇలా కవలల జననాలు రేటు అధికంగా ఉంది. ఈ నేపథ్యంలో అక్కడ పరిశోధనలు సాగించిన బృందం కోదిన్హి వచ్చి ఇక్కడి కవలల డీఎన్ఏ కూడా సేకరించి అధ్యయనం చేసింది. కానీ కవలల జననాలకు కారణమేంటో తెలుసుకోలేకపోయింది. దీంతో ఇప్పటికీ కోదిన్హి కవలల మిస్టరీ అలాగే ఉండిపోయింది.

ఈ ఊరివాళ్లకే కాదు.. ఈ ఊరికి వచ్చి స్థిరపడినవారికి కూడా కవలలు పుడుతున్నారని, ఈ ప్రాంతంలోనే ఏదో మహత్యం ఉందని గ్రామస్తులు చెబుతున్నారు. వాస్తవానికి ఈ ఊళ్లో కవలలు ఎక్కువగా ఉన్నారనే విషయం చాలా కొత్తగా బయటపడింది. 2006లో 8వ తరగతి చదువుతున్న సమీరా, ఫమీనా అనే కవల అమ్మాయిలు తమ తరగతిలోనే ఎనిమిది మంది కవలలు ఉన్న విషయాన్ని గుర్తించారు. ఇది వారికి కాస్త ఆశ్యర్యం కలిగించింది. మొత్తం స్కూల్ లో ఎంతమంది ఉన్నారనే విషయం తెలుసుకోవడానికి వారు ప్రయత్నించగా.. ఏకంగా 24 మంది ట్విన్స్ ఉన్నట్టు తేలింది. ఈ విషయం ఊళ్లో పెద్దలకు తెలిసింది. దీంతో ఊరు మొత్తం ఎంత మంది కవలలు ఉన్నారో తెలుసుకోవడానికి వారు 2008లో ఓ సర్వే చేశారు. ఆశ్చర్యకరంగా 280 మంది కవల జంటలు ఉన్నట్లు తెలియడంతో షాక్ తిన్నారు. తమ గ్రామానికి ఏదో ప్రత్యేకత ఉన్న విషయం అప్పుడు వారికి బోధపడింది. ఈ విషయం పత్రికల్లో రావడంతో కోదిన్హి గ్రామం గురించి ప్రపంచానికి తెలిసింది.