మేటర్‌ సీరియస్‌: తెలుగు రాష్ట్రాల్ని వణికిస్తున్న కరోనా!

తెలుగు రాష్ట్రాలకు సంబంధించి ఇప్పటిదాకా ఒకే ఒక్క కరోనా పాజిటివ్‌ కేసు నమోదయ్యింది. అది కూడా, బెంగళూరు నుంచి వచ్చిన వ్యక్తికి ఆ వైరస్‌ సోకింది. కానీ, తెలుగు రాష్ట్రాల్లో ప్రజలు ‘కరోనా’ పేరు చెబితేనే వణికిపోతున్నారు. ఎక్కడో చైనాలో పుట్టిన ఈ వైరస్‌, కాస్త లేటుగానే తెలుగు నేల మీదకు వచ్చింది. ఖచ్చితంగా వస్తుందని తెలుసు.. కానీ, తెలుగు రాష్ట్రాల్లోని ప్రభుత్వాలు తగిన రీతిలో జాగ్రత్తలు తీసుకోలేకపోయాయా.? అన్న చర్చ జరుగుతోందిప్పుడు.

మన దేశ జనాభా 130 కోట్లు. దేశంలో రద్దీ ప్రదేశాలు కోకొల్లలు. అపరిశుభ్ర ప్రాంతాలకు కొదవే లేదు. వ్యక్తిగత పరిశుభ్రత విషయంలో మన ప్రమాణాలు చాలా చాలా తక్కువ. తెలుగు రాష్ట్రాల్లో పరిస్థితి గురించి కొత్తగా చెప్పేదేముంది.? తాజాగా తూర్పుగోదావరి జిల్లాలో కరోనా అనుమానిత కేసు వెలుగు చూసింది. ఇప్పటికైతే ఆ వ్యక్తికి కరోనా వైరస్‌ వుందని అధికారిక ప్రకటన రాలేదు. కానీ, అనుమానాలు గట్టిగానే వున్నాయి.

మరి, ప్రభుత్వాలు ఏం చేస్తున్నాయి.? సరిపడా మాస్క్‌లు కూడా మన తెలుగు రాష్ట్రాల్లో లేని పరిస్థితి. ఇప్పటికిప్పుడు మాస్క్‌లను దిగుమతి చేసుకోవాలన్నా అది సాధ్యమయ్యే పని కాదు. ప్రపంచ వ్యాప్తంగా కరోనా తీవ్రతకి మాస్క్‌ల లభ్యత చాలా తగ్గిపోయింది. వ్యాక్సీన్‌ ఇంకా ఈ వైరస్‌కి అందుబాటులో లేదు. చికిత్స విషయంలో కూడా స్పష్టత లేదు. ‘కరోనా వచ్చినా ప్రమాదం లేదు.. ఎందుకంటే, మరణాల రేటు చాలా తక్కువగా వుంది..’ అని చావు కబురు చల్లగా చెబుతున్నారు ప్రభుత్వ పెద్దలు.

కానీ, కరోనా ఆర్థిక వ్యవస్థను ఛిన్నాభిన్నం చేస్తోంది. అవును, ప్రాణాలు తీసేయడం సంగతేమోగానీ, కరోనా దెబ్బకి.. ఎక్కడికక్కడ కార్యకలాపాలు నిలిచిపోతున్నాయి. దేశాలు సరిహద్దుల్ని మూసేసుకోవాల్సిన దుస్థితి. ఇది ప్రమాద తీవ్రతను చెప్పకనే చెబుతోంది. 2020లో అతి పెద్ద మహమ్మారిగా దీన్ని అభివర్ణించొచ్చు. ఆ మాటకొస్తే, ఇటీవలి కాలంలో ఎంత పెద్ద మహమ్మారి ప్రపంచాన్ని వణికించింది ఇంకోటి లేదన్నది నిర్వివాదాంశం.

ఈ పరిస్థితుల్లో తెలుగు రాష్ట్రాల ప్రభుత్వాలు ఈ మహమ్మారి దెబ్బకు ఎలా విలవిల్లాడతాయోగానీ, సోషల్‌ మీడియాలో వదంతులు.. మీడియాలో కథనాలు.. ప్రభుత్వాలు చేస్తోన్న హెచ్చరికలతో జనం మాత్రం తల్లడిల్లిపోతున్నారు.