జలుబు.. దగ్గా.. అయితే జాగ్రత్త పడాల్సిందే!

ఇప్పటివరకు జలుబు, దగ్గు వస్తే పెద్దగా పట్టించుకునేవారు కాదు. కానీ ప్రస్తుత పరిస్థితులు తుమ్మినా, దగ్గినా భయపడేలా ఉన్నాయి. ప్రపంచవ్యాప్తంగా కల్లోలం సృష్టిస్తున్న కరోనా వైరస్ తెలుగు రాష్ట్రాల్లోకి ప్రవేశించింది. చైనాలో పుట్టిన ఈ వైరస్.. ప్రపంచ దేశాలను గడగడలాడిస్తోంది. వరుసగా పలు దేశాలు ఈ మహమ్మారి బారిన పడుతున్నాయి. తాజాగా ఆ దేశాల జాబితాలోకి భారత్ కూడా చేరడం ఆందోళన కలిగిస్తోంది.

తొలుత కేరళలో ముగ్గురు వ్యక్తులకు ఈ వైరస్ సోకగా.. అక్కడి వైద్యుల ప్రతిభ వల్ల వారు కోలుకోగలిగారు. అంతా బాగానే ఉందనుకున్న తరుణంలో ఢిల్లీలో ఒకటి, హైదరాబాద్ లో ఒకటి కరోనా కేసులు వెలుగు చూడటం సర్వత్రా ఆందోళనకు కారణమవుతోంది. దీంతో హైదరాబాద్ బాధితుడు ఎవరెవరిని కలిశారో వివరాలు సేకరించిన అధికారులు.. వారికి కూడా పరీక్షలు జరిపారు. మొత్తం 88 మందిలో 36 మందిలో కరోనా అనుమానిత లక్షణాలు కనిపించడంతో ఆందోళన వ్యక్తమవుతోంది.

తాజాగా ఏపీలో కూడా కరోనా కేసు ఒకటి బయటి పడినట్టు తెలుస్తోంది. కొరియాలో పనిచేసిన ఓ వ్యక్తి ఇటీవల ఓ వివాహ వేడుక నిమిత్తం తూర్పుగోదావరి జిల్లాలోని ముమ్మిడివరం వెళ్లినట్టు సమాచారం. ఆయనకు కరోనా పాజిటివ్ అని తేలడంతో అక్కడ కలకలం రేగింది. అతడు కుటుంబ సభ్యులతో కలిసి ఉండటం, వివాహానికి హైదరాబాద్ నుంచి అక్కడకు వెళ్లడం, పెళ్లిలో పాల్గొనడంతో ఎంతమందికి ఈ వైరస్ సోకి ఉందో అనే ఆందోళన వ్యక్తమవుతోంది.

అయితే, కరోనా వైరస్ సోకుతుందని ఎవరూ ఆందోళన చెందొద్దని.. కొన్ని జాగ్రత్తలు తీసుకుంటే నియంత్రించవచ్చని వైద్యులు చెబుతున్నారు. జనసమ్మర్థం ఉన్న ప్రాంతాల్లోకి వెళ్లకుండా ఉండటం, బయటకు వెళ్లినప్పుడు మాస్క్ లేదా కర్చీఫ్ కట్టుకోవడం, ఎప్పటికప్పుడు చేతులు కడుక్కోవడం, ఎవరితోనూ కరచాలనం చేయకుండా ఉండటం, సాధ్యమైనంత వరకు ఇతరులకు దూరంగా ఉండటం, రైళ్లు, బస్సుల్లో ప్రయాణించేటప్పుడు జాగ్రత్తలు తీసుకోవడం, బయటి ఆహార పదార్ధాలు తినకుండా ఉండటం వంటివి చేయాలని సూచిస్తున్నారు.

ఒకవేళ జలుబు, దగ్గు వస్తే ఆలస్యం చేయకుండా వైద్యుడిని సంప్రదించాలని చెబుతున్నారు.