వైసీపీ ‘బులుగు’ ప్రచార దోపిడీపై ‘పచ్చ’ ఏడుపు.!

సరిపోయింది సంబడం.. రాష్ట్ర ప్రజల పరిస్థితి పెనం మీద నుంచి పొయ్యిలో పడ్డ చందాన తయారయ్యిందని గతంలోనే చెప్పుకున్నాం. కేవలం ప్రచారం కోసం చంద్రబాబు కోట్లాది రూపాయల ప్రజాధనాన్ని దుర్వినియోగం చేస్తున్నారంటూ అప్పట్లో వైఎస్సార్ కాంగ్రెస్ పార్టీ గగ్గోలు పెట్టింది. ఇప్పుడు అదే గగ్గోలు తెలుగుదేశం పార్టీ నుంచి వినిపిస్తోంది.

ఇక్కడ వాస్తవమేంటంటే, అప్పుడు టీడీపీ.. ఇప్పుడు వైసీపీ.. తేడా ఏం లేదు.. ప్రజా ధనాన్ని దుర్వినియోగం చేయడంలో ఒకర్ని మించి ఇంకొకరు. అచ్చంగా ప్రచారం కోసం గడచిన 20 నెలల్లో వైఎస్ జగన్ ప్రభుత్వం చేసిన ఖర్చు 272 కోట్లు. ఇందులో వైసీపీ సొంత మీడియా సంస్థ సాక్షికి చేసిన ఖర్చు 100 కోట్ల రూపాయలకు పైనే. అంటే, నెలకి 5 కోట్లు ప్రభుత్వం నుంచి సాక్షికి అధికారికంగా వెళుతోందన్నమాట. ఇందులో న్యూస్ ఛానల్ వ్యవహారం వేరే.. వేరే.. అనే చర్చ జరుగుతోంది.

అన్నట్టు, సాక్షి మీడియా సంస్థల్లో పనిచేసిన చాలామందిని ప్రభుత్వం వివిధ పదవులతో సత్కరించిన విషయం విదితమే. ఆ జీతాలు గట్రా లెక్కలు తీస్తే, తడిసి మోపెడైపోతుంది. ఇదంతా ప్రజాధనమే. అధికారంలోకి వచ్చేది ఎందుకయ్యా.? అంటే, సొంత మీడియా సంస్థల్ని ఉద్ధరించడానికి.. అన్నట్టు తయారయ్యింది పరిస్థితి.

టీడీపీ అను‘కుల’ మీడియాలో ఈ లెక్కలన్నీ బట్టబయలవుతున్నాయి.. గతంలో వైసీపీ అను‘కుల’ మీడియాలో చంద్రబాబు దుర్వినియోగం చేసిన ప్రజాధనం లెక్కలు తేలినట్టు. సుమారు 300 కోట్ల రూపాయలంటే ఆషామాషీ వ్యవహారం కాదు.. రాజధాని పేరుతో ఏదో ఒక గొప్ప నిర్మాణం చేపట్టొచ్చు.. లేదంటే, ఇంకేదన్నా సంక్షేమ పథకం కోసం ఖర్చుపెట్టొచ్చు. కానీ, అంత బాధ్యత అధికారంలో వున్నవారికి వుంటే ఇక మాట్లాడుకోవడానికి ఏముంటుంది.?

‘చంద్రబాబు ప్రభుత్వంలా మేం ప్రజాధనాన్ని ప్రచారం కోసం దుర్వినియోగం చెయ్యబోం. మా పాలనలో ఫుల్ పేజీ ప్రకటనలు మీడియాలో వుండవు..’ వైసీపీ ముఖ్య నేత ఒకరు ఆ మధ్య సోషల్ మీడియాలో గట్టిగానే కూశారు. ఆ కూతకీ, జరుగుతున్న తతంగానికీ సంబంధం ఏమన్నా వుందా.? నవ్విపోదురుగాక మనకేటి.? అన్నట్టుంది పరిస్థితి.