అమరావతి వ్యధ: టీడీపీ, వైసీపీ.. ఎందుకీ కట్టు కథ.?

అమరావతి పేరుతో లక్షల కోట్ల విలువైన భూ కుంభకోణం జరిగిందట. ఇది వైసీపీ చేస్తోన్న ఆరోపణ. అధికారంలోకి వచ్చి రెండేళ్లవుతోంది.. అర్థ రూపాయి అయినా ఈ కుంభకోణానికి సంబంధించి వెనక్కి రప్పించగలిగిందా వైసీపీ.? అన్న ప్రశ్నకు సమాధానమే లేదు, వుండదు కూడా.

కొన్నాళ్ళ క్రితం టీడీపీ నేత అచ్చెన్నాయుడిపై ఈఎస్ఐ మెడికల్ స్కాం ఆరోపణలు వచ్చాయి. కేసులు నమోదయ్యాయి. ఏమయ్యింది ఆ కేసు.? వెయ్యి కోట్ల కుంబకోణమన్నారు, వెయ్యి రూపాయలన్నా వెనక్కి వచ్చిందా.? లేదు, రాదు. వైఎస్ జగన్ అక్రమాస్తుల కేసులోనూ ఇంతే.

అసలు విషయానికొద్దాం.. అసైన్డ్ భూముల విషయంలో చంద్రబాబు సర్కార్ కుట్రపూరితంగా వ్యవహరించిందన్నది వైసీపీ ఆరోపణ. అధికారంలోకి వస్తూనే అమరావతిపై నానా రకాలుగా విచారణ చేశారు. కొండను తవ్వి ఎలకని పట్టిన చందంగా.. అని కూడా అనడానికి వీల్లేదు. ఎందుకంటే, ఆ ఎలక కూడా ఇప్పటిదాకా దొరకలేదిక్కడ. కానీ, అమరావతి పేరుతో రాజకీయాలు మాత్రం నిస్సిగ్గుగా జరుగుతున్నాయి.

దళిత రైతుల నుంచి భూముల్ని అప్పటి అధికార పార్టీ పెద్దలు కాజేశారన్నది వైసీపీ ప్రభుత్వ ఆరోపణ. కేసులు నమోదయ్యాయి.. మాజీ ముఖ్యమంత్రి చంద్రబాబుకి నోటీసులూ వెళ్ళాయి. ఎవరైతే తనకు ఫిర్యాదు చేశారని వైసీపీ ఎమ్మెల్యే చెబుతున్నారో, ఆ రైతులు ‘పోలీసులు మాకు విషయం చెప్పకుండా మా నుంచి బలవంతంగా సంతకాలు తీసుకున్నారు.. అవి, చంద్రబాబు మీద కేసులు పెట్టడానికని మాకు తెలియదు..’ అని కొందరు దళితులు చెప్పిన వైనాన్ని ‘స్టింగ్ ఆపరేషన్’ ద్వారా టీడీపీ బయటపెట్టింది.

నిజానికి, ఇది చాలా సీరియస్ అంశం. ఏపీ సీఐడీ ఈ విషయమై లోతుగా విచారణ జరపాలి. టీడీపీ స్టింగ్ ఆపరేషన్ తప్పయితే, టీడీపీపై చర్యలు తీసుకోవాలి. లేదూ, పోలీసులే బలవంతంగా సంతకాలు పెట్టించుకున్నారన్నది నిజమైతే, వారిపై కఠిన చర్యలు తీసుకోవాలి. కేసులు పెట్టాల్సింది దళితులైతే, వారి తరఫున ఎమ్మెల్యే కేసు పెట్టడమే ఈ కేసులో పస లేదన్న విషయాన్ని తేటతెల్లం చేసిందని రాజకీయ విశ్లేషకులు అభిప్రాయపడుతున్నారు.

టీడీపీ, వైసీపీ మధ్య ఆధిపత్య పోరులో భాగంగానే అమరావతి చుట్టూ కట్టు కథలు అల్లబడుతున్నాయన్నది నిర్వివాదాంశం. ఓ ప్రాంతం, అందులో ప్రజలు.. వీళ్ళంతా రాష్ట్రానికి చెందినవారే. ఓ ప్రాంతంపై రాజకీయ కుట్ర.. అది ఏ పార్టీ చేసినా అది క్షమార్హం కాదు. అవినీతి జరిగితే, ఆ మొత్తాన్ని వెనక్కి లాక్కొచ్చి.. రాష్ట్ర ప్రజలకు పంచాల్సిందే. కానీ, ఇక్కడ టీడీపీ – వైసీపీ రాజకీయాన్ని పంచుకుంటున్నాయి.