పుదుచ్చేరి పరిస్థితేంటి?

పుదుచ్చేరి లో నారాయణస్వామి నేతృత్వంలోని కాంగ్రెస్-డీఎంకే సర్కారు కూలిపోవడంతో తదుపరి ఏం జరగనుందనే అంశం చర్చనీయాంశంగా మారింది. సరైన సంఖ్యాబలం లేకపోవడంతో సోమవారం సభలో బలం నిరూపించుకోకుండానే సీఎం నారాయణ స్వామి బటయకు వెళ్లిపోయారు. అనంతరం తన రాజీనామా లేఖను లెఫ్టినెంట్ గవర్నర్ తమిళిసై సౌందరరాజన్ కు సమర్పించారు. ఈ నేపథ్యంలో ఇప్పుడు అందరి దృష్టీ గవర్నర్ తమిళిసైపై పడింది. మరో రెండు నెలల్లోపే అక్కడ అసెంబ్లీకి ఎన్నికలు జరగాల్సిన తరుణంలో ఆమె ఇప్పుడు ఎలాంటి నిర్ణయం తీసుకుంటారో అని ఆసక్తిగా చూస్తున్నారు. అధికార కూటమి కంటే విపక్ష కూటమికే బలం ఎక్కువగా ఉన్నందున ప్రభుత్వ ఏర్పాటుకు వారిని ఆహ్వానిస్తారా లేదా రాష్ట్రపతి పాలనకు సిఫార్సు చేస్తారా లేదా అసెంబ్లీని రద్దు చేస్తారా అనేదానిపై ఉత్కంఠ నెలకొంది.

ఒకవేళ ప్రతిపక్ష కూటమిని సర్కారు ఏర్పాటుకు ఆహ్వానిస్తే.. ఎన్ఆర్ కాంగ్రెస్ అధినేత రంగస్వామి ముందుకు వస్తారా లేదా అనేదానిపై చర్చ జరుగుతోంది. కేవలం రెండు నెలల కాలానికి ఆయన పగ్గాలు చేపట్టడానికి ముందుకు రాకపోవచ్చని అంటున్నారు. అయితే, అన్నాడీఎంకే-బీజేపీ మాత్రం ప్రభుత్వ ఏర్పాటుకు ఉత్సాహం కనబరుస్తున్నాయి. ఇప్పటికే బీజేపీ నేత నమశ్శివాయం ఈ మేరకు తమ సమ్మతి తెలియజేశారు. అయితే, మరో పది రోజుల్లో అసెంబ్లీ ఎన్నికల షెడ్యూల్ విడదల కావడం ఖాయంగా కనిపిస్తున్న తరుణంలో రాష్ట్రపతి పాలనకే గవర్నర్ మొగ్గు చూపే అవకాశం ఉందని విశ్లేషిస్తున్నారు.