జగనన్న లెగ్గు.. చంద్రన్న కుట్ర.. రెండిటికీ ఛాన్స్‌ లేదాయె..

శ్రీశైలం ప్రాజెక్టులో భారీ అగ్ని ప్రమాదం చోటు చేసుకున్న విషయం విదితమే. అయితే, ఈ ప్రమాదం తెలంగాణ వైపున జరిగింది. తెలంగాణకు చెందిన జల విద్యుత్‌ కేంద్రంలో ప్రమాదం చోటు చేసుకోవడంతో.. ఆంధ్రప్రదేశ్‌ రాజకీయాలు వేడెక్కలేదుగానీ, లేకపోతే.. తగలబడిపోయేవి.! ఆంధ్రప్రదేశ్‌ ముఖ్యమంత్రి వైఎస్‌ జగన్‌ ఈ రోజు శ్రీశైలం ప్రాజెక్టుని సందర్శించాల్సి వుంది. వాతావరణం అనుకూలించకపోవడంతో, వైఎస్‌ జగన్‌ తన టూర్‌ని రద్దు చేసుకున్నట్లు కాస్సేపటి క్రితమే బ్రేకింగ్‌ న్యూస్‌లు షురూ అయ్యాయి.

‘జగనన్న లెగ్గు మహిమ.. వెళ్ళాలనుకుంటేనే ఇంతటి ప్రమాదం జరిగింది. ఒకవేళ వెళ్ళి వుంటేనో..’ అంటూ యెల్లో బ్యాచ్‌ సోషల్‌ మీడియాలో అప్పుడే రచ్చ షురూ చేసేసింది. నిజానికి, శ్రీశైలం ప్రాజెక్టుకి సంబందించి ఇది చాలా పెద్ద ప్రమాదంగా అభివర్ణిస్తున్నారు. భూగర్భ జల విద్యుత్‌ కేంద్రం కావడంతో ఎంత పటిష్టమైన భద్రతా చర్యలు చేపట్టినా, అప్పుడప్పుడూ ప్రమాదాలు జరుగుతూనే వుంతాయి. వాటిని అదుపు చేసేందుకు యంత్రాంగం పూర్తిస్థాయిలో సన్నద్ధంగా వుంటుంది. అయితే, ఈసారి ప్రమాద తీవ్రత చాలా ఎక్కువేనని అంచనా వేస్తున్నారు.

ఒకవేళ ఇదే ప్రమాదం ఆంధ్రప్రదేశ్‌ వైపున జరిగి వుంటే ఇంకేమన్నా వుందా.? ‘ఇది చంద్రబాబు కుట్ర..’ అంటూ వైసీపీ ప్రజా ప్రతినిథులు మీడియా సమావేశాల్లో ఊదరగొట్టేసేవారు. ‘కుట్ర కోణంలో సమగ్ర విచారణ జరపాల్సిందే..’ అటూ వైసీపీ నేతలు డిమాండ్‌ చేసేసేవారు కూడా. అదే సమయంలో తెలుగు తమ్ముళ్ళు కూడా, ‘అధికార పార్టీపైనే మాకు అనుమానాలు..’ అంటూ నిస్సిగ్గుగా ఆరోపణలు చేసేవాళ్ళు. దేశంలో ఎక్కడా లేని విధంగా నీఛ నికృష్ట రాజకీయాలు ఆంధ్రప్రదేశ్‌లో జరుగుతున్నాయన్నది ఓపెన్‌ సీక్రెట్‌.

ఇతర రాష్ట్రాల్లోనూ రాజకీయాలు ఎప్పటికప్పుడు వేడెక్కుతుంటాయిగానీ.. ఆంధ్రప్రదేశ్‌లో మరీ దారుణం. కులం, మతం, ప్రాంతం.. ఇలా దేన్నీ ప్రధాన రాజకీయ పార్టీలు విడిచిపెట్టవు. మరీ చిత్రంగా అధికారంలో వున్న పార్టీ, విపక్షాలపై ఆరోపణలు చేయడం ఆంధ్రప్రదేశ్‌లోనే చెల్లుతుతుందేమో. ఏదేమైనా, జరిగింది పెను ప్రమాదం.. ఇలాంటి ప్రమాదాలకు ఆస్కారం లేకుండా మరింత పటిష్టమైన భద్రతా చర్యలు తీసుకోవాలి. వున్నపళంగా ఆంధ్రప్రదేశ్‌, తమవైపునున్న జల విద్యుత్‌ కేంద్రంలో భద్రతా చర్యల్ని సమీక్షించి, అవసరమైతే మరిన్ని జాగ్రత్తలు తీసుకోవాల్సి వుంది.