దేవుడున్నాడు.. ఐటీ రెయిడ్స్‌పై శ్రీరెడ్డి ఫుల్‌ హ్యాపీ.!

ఊళ్ళో పెళ్ళికి ‘డాష్‌ డాష్‌’ హడావిడి అన్నట్లుంది వ్యవహారం. నిర్మాత సురేష్‌ బాబు, హీరోలు వెంకటేష్‌, నానిలపై ఐటీ రెయిడ్స్‌ జరుగుతున్న దరిమిలా, ‘దేవుడున్నాడు’ అంటూ శ్రీరెడ్డి సోషల్‌ మీడియా వేదికగా పండగ చేసుకుంది. కామెడీ కాకపోతే, సినీ ప్రముఖులకి ఐటీ రెయిడ్స్‌ ఏమన్నా కొత్తా.? చాలా సినిమాల విషయంలో ఆయా సినీ ప్రముఖులు ఐటీ రెయిడ్స్‌ని ఎదుర్కొన్నారు.

ఇవి సర్వ సాధారణమైన తనిఖీలు మాత్రమేనంటూ సినీ పరిశ్రమ నుంచి ఓ బలమైన అభిప్రాయం బయటకొస్తోంది. అసలు ఐటీ రెయిడ్స్‌ ఎందుకు జరిగాయి.? ఈ సోదాల్లో అధికారులు ఏం తేల్చబోతున్నారు.? అన్నది వేరే విషయం. సురేష్‌ బాబు తనయుడు తనను మోసం చేశాడని చాలా కాలంగా ఆరోపిస్తోన్న శ్రీరెడ్డి, కొన్ని ఫొటోల్ని చూపించడం మినహా, ఇప్పటిదాకా సరైన ఆధారాల్ని చూపించలేకపోయింది.

నిజంగానే, సురేష్‌బాబు తనయుడు శ్రీరెడ్డిని మోసం చేసి వుంటే.. శ్రీరెడ్డి కేవలం పబ్లిసిటీ స్టంట్స్‌కి మాత్రమే పరిమితమవుతుందా.? ఇక, నాని విషయంలో అయితే మరీ జుగుప్సాకరమైన ఆరోపణలు చేసింది శ్రీరెడ్డి. ఓ దశలో నాని న్యాయ పోరాటానికి సిద్ధమయ్యాడంటూ ప్రచారం జరిగింది కూడా. అయితే, ఆ తర్వాత ఆ వ్యవహారం సద్దుమణిగిపోయింది.

మొత్తమ్మీద, ఎక్కడ ఏ విషయం జరిగినా, దాన్ని తనకు అనుకూలంగా పబ్లిసిటీ చేసుకోవడంలో శ్రీరెడ్డి తర్వాతే ఎవరైనా. అత్యంత జుగుప్సాకరమైన భాష తనకు మాత్రమే తెలుసని శ్రీరెడ్డి అనుకుంటే పొరపాటే. తమ స్థాయిని దిగజార్చేసుకుంటే.. ఎవరైనా శ్రీరెడ్డికి మించిన స్థాయిలో బూతులు మాట్లాడగలరన్న విషయం ఆమెకు ఎప్పుడు అర్థమవుతుందో ఏమో.!