రష్యాలో కలకలం.. విపక్ష నేతపై విష ప్రయోగం..?

రష్యాలో విపక్ష నేత అలెక్సే నావల్నీపై విష ప్రయోగం జరిగిందన్న వార్త ఆ దేశంలో కలకలం రేపుతోంది. సైబీరియా నుంచి మాస్కోకు వస్తున్న సమయంలో విమానంలో ఆయన తీవ్ర అస్వస్థతకు గురయ్యారు. అత్యవసర వైద్యం కోసం మార్గమధ్యలో ఓమస్క్ నగరంలో విమానం ల్యాండ్ చేసి ఆసుపత్రికి తరలించారు. ఈ నేపథ్యంలో ఆయనపై విష ప్రయోగం జరిగి ఉండొచ్చనే వైద్యులు తెలిపారు. ఈమేరకు ఆయన మీడియా కార్యదర్శి కిరా యార్మిష్ కూడా ట్విట్టర్ లో స్పందించారు. ప్రస్తుతం ఆయన కోమాలో ఉన్నట్టు తెలుస్తోంది.

నావెల్నీ ఆరోగ్యం విషమంగా ఉందనీ.. ఇంకా ఆయనకు వెంటిలేటర్ పై చికిత్స చేస్తున్నారని వెల్లడించారు. దేశంలో అవినీతి వ్యతిరేక సంస్థ వ్యవస్థాపకుడిగా నావల్నీ ప్రముఖంగా నిలిచారు. నావెల్నీపై విష ప్రయోగం జరిగిందనే అనుమానాల్ని కొట్టి పారేయలేమని కిరా అంటున్నారు. ఆయన ఉదయం నుంచీ టీ మాత్రమే తీసుకున్నారు. అందులోనే విష ప్రయోగం జరిగుండొచ్చని అంటున్నారు. ‘వైద్యులు కూడా ఇదే విషయాన్ని ధ్రువీకరిస్తున్నారు. వేడి పదార్ధాల్లో విషం కలిపితే శరీరంపై త్వరగా ప్రభావం చూపుతుందని వైద్యులు అంటున్నారు’ అని కిరా అంటున్నారు. గతంలోనూ నావెల్నీపై ఇదే తరహాలో విష ప్రయోగం చేశారని తెలుస్తోంది.

నావెల్నీ ‘రష్యా ఆఫ్ ది ఫ్యూచర్’ అనే పార్టీని స్థాపించారు. దీని ద్వారా ప్రభుత్వంలోని కొందరి అవినీతిని బయటపెడుతున్నారు. దీంతో ఆయన జైలు పాలయ్యారు. అయితే రాజకీయ కక్షల నేపథ్యంలో ఆరోపణలని తేలడంతో నావెల్నీ జైలు నుంచి విడుదలయ్యారు. రష్యా అధ్యక్షుడిపై కూడా ఆయన విమర్శలు చేశారు. దీంతో ఆయన పుతిన్ కు ప్రత్యర్ధిగా ఎదిగారు.