YS Jagan Mohan Reddy: ఏపీ సీఎం వైఎస్ జగన్ ఢిల్లీ టూర్ మతలబు ఏంటి.?

YS Jagan Mohan Reddy: ముఖ్యమంత్రి వైఎస్ జగన్ మోహన్ రెడ్డి ఈ మధ్య కొద్ది రోజుల వ్యవధిలో పలుమార్లు ఢిల్లీకి వెళ్ళారు. రాష్ట్ర వ్యవహారాల నిమిత్తం ముఖ్యమంత్రి ఢిల్లీకి వెళితే అందులో తప్పేముంది.? కేంద్ర, రాష్ట్ర సంబంధాలు సఖ్యంగా వుండాలి. ప్రధానికి ముఖ్యమంత్రి రాష్ట్రానికి సంబంధించిన అంశాలపై వినతులు, విజ్ఞప్తులు చేయాలి కూడా.!

ప్రధాని, కేంద్ర మంత్రులు.. ఇలా కేంద్ర ప్రభుత్వ పెద్దలతో ముఖ్యమంత్రి వైఎస్ జగన్ మోహన్ రెడ్డి భేటీలు నిర్వహిస్తున్నారు. హుటాహుటిన ఢిల్లీ పర్యటనలు.. ఈ క్రమంలో ‘రాష్ట్ర ప్రయోజనాల నిమిత్తం’ అంటూ వైసీపీ ప్రకటనలు.. ఇవన్నీ సర్వసాధారణమైపోయాయ్.!

ఇంతకీ, రాష్ట్ర ప్రయోజనాల గురించి కేంద్రానికి ముఖ్యమంత్రి ఎలాంటి విజ్ఞప్తులు చేస్తున్నట్లు.? వాటిల్లో ఎన్నింటిని కేంద్రం మన్నిస్తున్నట్లు.? ఇదో మిలియన్ డాలర్ సమస్యగా మారిపోయింది. ముఖ్యమంత్రి ఢిల్లీకి వెళుతున్నారు, వస్తున్నారు.! ముఖ్యమంత్రి ఢిల్లీకి వచ్చిన పనుల గురించి కేంద్ర ప్రభుత్వం ఎలాంటి ప్రకటనలూ చేయడంలేదు.

ప్రకటనలంటే.. ఫలానా విషయమై కేంద్రానికి ముఖ్యమంత్రి విజ్ఞాపన చేశారు, వాటి పట్ల కేంద్రం తాలూకు స్పందన ఇదీ.. అని కేంద్రం వెల్లడించడమన్నమాట.
ఇంకోపక్క, వైఎస్ వివేకానందరెడ్డి హత్య కేసుకి సంబంధించి కీలక పరిణామాలు చోటు చేసుకుంటున్నాయి. వీటికీ ముఖ్యమంత్రి ఢిల్లీ పర్యటనలకీ లింకులున్నాయంటోంది ఏపీలోని ప్రధాన ప్రతిపక్షం తెలుగుదేశం పార్టీ. ఈ తరహా ఆరోపణలు వస్తున్నప్పుడైనా కేంద్రం స్పందించాలి కదా.?

ప్రత్యేక హోదా, పోలవరం ప్రాజెక్టు, రాజధాని.. ఇలా చాలా సమస్యలున్నాయ్. ముఖ్యమంత్రి వైఎస్ జగన్ మోహన్ రెడ్డి ఘనంగా చెప్పుకునే దిశ చట్టానికీ కేంద్రంతో లింక్ వుంది. శాసన మండలి రద్దు వ్యవహారం సరే సరి. వేటిపైనా కేంద్రం స్పందించదాయె.! అయిననూ పోయిరావలె ముఖ్యమంత్రి హస్తినకు.!