రాయపాటి తీగ లాగేది ఆయన డొంక కదిలించడానికేనా?

బ్యాంకు రుణం ఎగవేసిన కేసులో మాజీ ఎంపీ రాయపాటి సాంబశివరావు నివాసం, కార్యాలయాల్లో సీబీఐ దాడులు చేసిన సంగతి తెలిసిందే. పైకి బ్యాంకు రుణాల ఎగవేత అని చెబుతున్నా.. అంతర్గతంగా ఈ దాడుల లక్ష్యం వేరనే గుసగుసలు వినిపిస్తున్నాయి. టీడీపీ అధినేత చంద్రబాబు ఆర్థిక మూలాలను పెకిలించే ఉద్దేశంతో కేంద్ర ప్రభుత్వ పెద్దలు ఈ మేరకు వ్యూహాత్మకంగా ముందుకెళ్తున్నారని చెబుతున్నారు.

గత ఎన్నికల ముందు బీజేపీకి వ్యతిరేకంగా, ముఖ్యంగా ప్రధాని మోదీ లక్ష్యంగా చంద్రబాబు తీవ్రంగా విమర్శలు గుప్పించిన సంగతి తెలిసిందే. అలాగే బీజేపీ జాతీయ అధ్యక్షుడు అమిత్ షాపైనా ఆరోపణలు చేశారు. పైగా అప్పుడు కాంగ్రెస్ పార్టీతో చేతులు కలిపిన చంద్రబాబు.. ఆ పార్టీకి భారీ మొత్తంలో ఆర్థిక సాయం కూడా చేశారనే వ్యాఖ్యలు వినిపించాయి. బీజేపీని ఓడించడానికి చేయాల్సిన ప్రయత్నాలన్నీ చంద్రబాబు చేయడం కమలథానులకు ఆగ్రహం కలిగించింది. దీంతో ఎన్నికలకు ముందే టీడీపీకి ఆర్థికంగా అండగా నిలిచేవారిపై సీబీఐ, ఐటీ సంస్థల దాడులు జరిగాయి. ఎన్నికలు ముగిసిన తర్వాత తిరిగి మోదీయే మళ్లీ అధికారంలోకి రావడంతో చంద్రబాబు ఇరకాటంలో పడ్డారు.

బాబు ఆర్థికంగా బలంగా ఉంటే ఎప్పటికైనా తమకు నష్టం కలిగే అవకాశం ఉందని నిర్ణయానికి వచ్చిన మోదీ, షాలు ఆ మూలాలను కదిలించే పనిని తాజాగా వేగవంతం చేశారు. ఇందులో భాగంగానే రాయపాటిపై దాడులు మొదలయ్యాయి. ఈ దాడుల్లో దొరికిన సమాచారం మేరకు సీబీఐ తదుపరి అడుగులు ఉంటాయని.. ముఖ్యంగా టీడీపీ ఆర్థిక మూలాలు దెబ్బకొట్టడమే వీటి లక్ష్యమని పలువురు అభిప్రాయపడుతున్నారు.

టీడీపీ అధినేత చంద్రబాబుకు అత్యంత సన్నిహితుడైన కేంద్ర మాజీ మంత్రి, బీజేపీ ప్రస్తుత నేత సుజనా చౌదరిపై ఉన్న కేసులను కూడా తవ్వే అవకాశం ఉందని రాజకీయ వర్గాల్లో చర్చ జరుగుతోంది. తద్వారా బీజేపీలో ఉన్నంత మాత్రాన ఎలాంటి రక్షణలూ ఉండవని చెప్పడంతోపాటు చంద్రబాబును ఫిక్స్ చేయడానికి అవకాశం ఉంటుందని కమలనాథులు యోచిస్తున్నట్టు సమాచారం.