తుస్సుమన్న రాయలసీమ గర్జన.! మంత్రులే హ్యాండిచ్చేశారే.?

అయ్యయ్యో.. ఒక్క ఎమ్మెల్యే కూడా రాయలసీమలో రాజధాని కోసం రాజీనామా చేయలేకపోయారాయె.! రాయలసీమలో న్యాయ రాజధాని కోసం ఒక్క సీమ మంత్రి కూడా తాను రాజీనామా చేస్తానంటూ ముఖ్యమంత్రి వైఎస్ జగన్ మోహన్ రెడ్డిని అనుమతి కోరలేదే.! ఉత్తరాంధ్ర వైసీపీ నేతల్లో వున్న తెగువలో పదో వంతు.. కాదు కాదు వందో వంతు కూడా రాయలసీమ వైసీపీ నేతల్లో లేకుండా పోయిందే.!

ఇలా రాయలసీమలో చర్చ జరుగుతోంది. నిజమే మరి, విశాఖ గర్జన కోసం నానా హంగామా చేసేశారు. టీటీడీ ఛైర్మన్ వైవీ సుబ్బారెడ్డి కూడా రంగంలోకి దిగారు. మంత్రులు బొత్స సత్యనారాయణ, రోజా.. ఇలా చాలామంది విశాఖ వేదికగా గర్జించారు.! కానీ, రాయలసీమలో.. అందునా ఆధ్మాత్మిక నగరం తిరుపతిలో ఎందుకు వైసీపీ ఆ స్థాయిలో గర్జన నిర్వహించలేకపోయింది.?

అన్నట్టు, విశాఖలో గర్జన నిర్వహించింది నాన్ పొలిటికల్ జేఏసీ అట. అయినాగానీ, అందులో రాజకీయ నాయకుల హంగామా ఎక్కువగా కనిపించింది. మరి, రాయలసీమలో వైసీపీ నేత, ఎమ్మెల్యే భూమన కరుణాకర్ రెడ్డి కదా తిరుపతి వేదికగా గర్జన నిర్వహించింది. అందునా, ‘ఆత్మగౌరవ నినాదం’ అన్నారాయన.!

ఒక్కరంటే ఒక్క వైసీపీ నేత కూడా రాయలసీమ ఆత్మగౌరవాన్ని గుర్తించలేకపోయారని అనుకోవాలేమో ఇప్పుడు.! అంతేనా, రాయలసీమేతర ప్రాంత వైసీపీ నేతలు, రాయలసీమ ఆత్మగౌరవాన్ని అస్సలు పట్టించుకోలేదు.. రాయలసీమ వైసీపీ నేతలు, ఉత్తరాంధ్ర ఆత్మగౌరవాన్ని పట్టించుకున్నంతగా.!

వీళ్ళు అక్కడికి వెళ్ళి.. అక్కడి ఉద్యమానికి ఉపిరి పోసే ప్రయత్నం చేశారు.. వాళ్ళు ఇక్కడికి రాలేదు సరికదా.. ఇక్కడున్న వీళ్ళు కూడా రాయలసీమ ఆత్మగౌరవాన్ని చంపేశారన్న చర్చ సీమ ప్రజల్లో జరుగుతోంది. కటకటా.. ఇదేం పరిస్థితి.? అసలు ఎక్కడ తేడా కొట్టింది.?

వైసీపీ అధినేత, ముఖ్యమంత్రి వైఎస్ జగన్ మోహన్ రెడ్డి కూడా రాయలసీమని లైట్ తీసుకోవడం వల్లే వైసీపీ మంత్రులు కూడా లైట్ తీసుకున్నారా.? అన్న ప్రశ్నకు సీమ వైసీపీ నేతలు ఏం సమాధానమిస్తారో ఏమో.!