‘కటౌట్ చూసి కొన్ని కొన్ని నమ్మేయాలి డ్యూడ్’.. పదునైన ఈ డైలాగ్ చెప్పాల్సిన హీరోలో ఆ కెపాసిటీ ఉండాల్సిందే. మిర్చి సినిమాలో డైలాగ్ చెప్పగానే దెబ్బకి కారు టైరు ఊడిపడినట్టే.. ఫ్యాన్స్ ఈలలు, చప్పట్లతో ధియేటర్లు హోరెత్తిపోయాయి. అంతటి ఎఫెక్ట్ చూపిన ఆ హీరోనే ప్రభాస్. నిలువెత్తు రూపం, మాటలో గాంభీర్యం, ఆహార్యంలో రాజసం ప్రభాస్ సొంతం. నిజ జీవితంలో ప్రభాస్ మంచితనం, ఎదుటివారికి ఇచ్చే గౌరవమర్యాదలు, ఆతిధ్యం ఎప్పుడూ ప్రశంసల వర్షం కురిపిస్తాయి. తెర బయట ‘డార్లింగ్’ అనే పలకరింపుతో ఎదుటివారిని ఆకట్టుకునే ప్రభాస్.. తెరపై తీక్షణమైన చూపుతో శత్రువుల గుండెలు అదిరేలా చేస్తాడు. అది నిజమనిపించేలా నటించడం ఆయన ప్రత్యేకత. ఒక్క మాటలో చెప్పాలంటే టాలీవుడ్ కటౌట్ ప్రభాస్. నేడు డార్లింగ్ ‘ప్రభాస్’ పుట్టినరోజు.
కెరీర్ టర్నింగ్ వర్షం..
పెదనాన్న కృష్ణంరాజు నట వారసుడిగా ఎంట్రీ ఇచ్చి.. తనదైన నటనతో తెలుగు ప్రేక్షకుల అభిమానాన్ని, అభిమానుల గుండెల్లో చోటుని సంపాదించుకున్నాడు. సైలెంట్ గా సినిమాలు చేస్తున్న ప్రభాస్ ను తెరపై వైలెంట్ గా చూపిన సినిమా వర్షం. తెరపై ఫెరోషియస్ నటనతో నిప్పుల వానే కురిపించాడు. తనపై ప్రేక్షకుల అభిమాన జల్లులు పడేలా చేశాడు. ‘అమితాబ్ కు దీవార్, చిరంజీవికి ఖైదీలా ప్రభాస్ కు వర్షం అవుతుంద’ని చిత్ర నిర్మాత విడుదలకు ముందు చెప్పిన మాటను నిజం చేశాడు. అక్కడి నుంచి వెనుదిరిగి చూడని ప్రభాస్.. చత్రపతిలో రౌద్రం, మున్నాలో యూత్, బుజ్జిగాడులో మాస్, బిల్లాలో సెటిల్డ్ పెర్ఫార్మెన్స్, డార్లింగ్ లో లవర్ బాయ్, మిస్టర్ పర్ఫెక్ట్ లో ఫ్యామిలీ ఇమేజ్ సొంతం చేసుకుని తెలుగు సినిమా న్యూ జనరేషన్ టాప్ హీరోల లిస్టులో చేరిపోయాడు.
బాహుబలితో నేషనల్ స్టార్ డమ్..
తెలుగు సినిమా అద్భుతం.. భారతీయ చిత్ర పరిశ్రమే నోరెళ్లబెట్టి చూసిన బాహుబలి సిరీస్ సినిమాలతో ప్రభాస్ క్రేజ్, ఇమేజ్ ఆకాశమంత ఎత్తుకి వెళ్లిపోయాయి. టైటిల్ కు తగ్గ రూపం, పాత్రకు సరిపోయిన ఆహార్యంతో భారతీయ సినీ ప్రేక్షకుల్ని మెప్పించాడు. రాజమౌళి గీసిన పాన్ ఇండియా మూవీ కాన్సెప్టుకి బొమ్మలో ప్రభాస్ ఒదిగిపోయి.. ప్రభాస్ సినిమాను జాతీయస్థాయిలో తీయాలనే రేంజ్ సంపాదించాడు. ‘కల్కి’తో అంతర్జాతీయస్థాయి సినిమాలు తీస్తారని నిర్మాత అశ్వనీదత్ అంటున్నారంటే ప్రభాస్ రేంజ్ సినిమాలేంటో అర్ధమవుతుంది. త్వరలో రానున్న సలార్ కోసం యావత్ భారతీయ ప్రేక్షకులు ఎదురుచూస్తున్నారంటే అతిశయోక్తి కాదు. ఇంతటి రేంజ్ ఉన్న ప్రభాస్.. భవిష్యత్తులో మరిన్ని విజయాలు సాధించాలని.. భారతీయ సినిమా ప్రతిష్ట పెంచాలని మనసారా కోరుకుంటూ బర్త్ డే విషెష్ చెప్తోంది ‘తెలుగు బులెటిన్’.