పోలవరం ప్రాజెక్టు ‘ఎత్తు’ మిస్టరీ: ఎవరిది బుకాయింపు.!

ఆంధ్రప్రదేశ్ రాష్ట్ర జీవనాడి అయిన పోలవరం ప్రాజెక్టు ఎత్తు విషయమై గత కొంతకాలంగా రాజకీయ రగడ జరుగుతోంది. ఆలూ లేదు, చూలూ లేదు కొడుకు పేరు సోమలింగం.. అన్నట్టు, ప్రాజెక్టు పూర్తయ్యే దారి కనిపించడంలేదుగానీ, పోలవరం ప్రాజెక్టు ఎత్తు గురించిన గోలేంటట.? అనేవారూ లేకపోలేదనుకోండి.. అది వేరే సంగతి.

పోలవరం ప్రాజెక్టుకి రాజకీయ గ్రహణం పట్టింది. ఒకప్పుడు ‘జలయజ్ఞం’ పేరుతో పోలవరం ప్రాజెక్టు చుట్టూ బోల్డంత పబ్లిసిటీ స్టంట్ జరిగింది.. చాలామంది రాజకీయ నాయకులు ఆర్థికంగా బలపడ్డారు. ఆ ప్రాజెక్టు ప్రజలకు కాదు, రాజకీయ నాయకులకు, పార్టీలకు జీవనాడిగా మారిపోయింది మరి.

పోలవరం ప్రాజెక్టుని ఏటీఎంలా చంద్రబాబు వాడుకున్నారని గతంలో ఆరోపించిన ప్రధాని నరేంద్ర మోడీ, ఆ ఏటీఎం నుంచి ఎంత సొమ్ము అక్రమంగా బయటకు పోయిందీ తేల్చేలేదటే ఆ తర్వాత ‘వాటాల్లో’ పంపకాలు సజావుగా జరిగాయనే అనుకోవాలేమో.

ఇక, పోలవరం ప్రాజెక్టులో అక్రమాల గుట్టు తేల్చుతామని చెప్పిన వైసీపీ, అధికారంలోకి వచ్చాక ఒక్క రూపాయి కూడా రికవరీ చేయలేదంటే, ఆ ప్రాజెక్టు పేరు చెప్పి వైసీపీకి దక్కిన వాటా కూడా ఘనంగానే వుండి వుండాలి.

ఇంత నాటకం నడిచింది ఇన్నేళ్ళలో పోలవరం ప్రాజెక్టు చుట్టూ. కేంద్రమేమో, కొత్త అంచనాలకు తగ్గట్టుగా ‘ఖర్చు’కి ఆమోదం తెలుపుతుంది.. కానీ, అంతలోనే అభ్యంతరాలు వ్యక్తం చేస్తుంటుంది. రాష్ట్రమేమో ఒక్కోసారి ఒక్కోలా వ్యవహరిస్తుంటుంది. పోలవరం ప్రాజెక్టు పరిస్థితి మాత్రం ఎక్కడ వేసిన గొంగడి అక్కడే అన్నట్టు తయారైంది.

2018 చివరి నాటికి పూర్తవ్వాల్సిన ప్రాజెక్టు, 2021 చివరి నాటికీ పూర్తి కాలేదు. త్వరలో.. అతి త్వరలో.. అంటూ ఏళ్ళు గడిచిపోతున్నాయి. ఇప్పుడేమో ఎలాగోలా ‘మమ’ అనిపించేయడానికి ‘ఎత్తు తగ్గింపు’ వ్యవహారాన్ని తెరపైకి తెచ్చినట్టున్నారు. ‘ప్రాజెక్టు ఎత్తు తగ్గిస్తామని తమకు ఆంధ్రప్రదేశ్ ముఖ్యమంత్రి హామీ ఇచ్చినట్లు’ తెలంగాణ ముఖ్యమంత్రి కేసీయార్, అసెంబ్లీలోనే ప్రకటించేశారు గతంలో.

అబ్బే, తూచ్.. టీడీపీ డ్రామాలాడుతోంది.. టీడీపీ అనుకూల మీడియా తప్పుడు ప్రచారం చేస్తోందంటోన్న వైసీపీ, నిజానిజాలేంటో మాత్రం గుండె మీద చెయ్యేసుకుని చెప్పలేకపోతోంది.