“గాజువాక లో పవన్ గెలుపు సందేహమేనా?!!”

పవర్‌స్టార్‌ పవన్‌ కళ్యాణ్‌ గాజువాకలో గెలిచే అవకాశం లేదని.. ఒక ప్రముఖ దినపత్రిక పెద్ద కథనాన్ని వండివార్చింది. నిజంగా ఆ అవకాశం ఉందా అన్నది కూడా ఇక్కడ పరిశీలించాల్సిన అవసరం కనిపిస్తోంది. ఒక ఖచ్చితమైన సమాచారం లేనిదే ఆ పత్రిక ఇలాంటి కథనాన్ని ప్రసారం చేయదనే వారు ఉన్నారు. నిజానికి చంద్రబాబు పవన్‌ కళ్యాణ్‌ లోపాయికారి ఒప్పందంలో ఉన్నారన్న వార్తలు మొదటి నుంచి వస్తున్న తరుణంలో తెలుగుదేశానికి అనుకూలంగా ఉండే ఆ పత్రికలోనే ఇలాంటి కథనం రావడం నిజంగా ఆశ్చర్యాన్ని కలిగిస్తోంది.

ఆ పత్రిక కథనం ప్రకారం పవన్‌కళ్యాణ్‌ గాజువాకలో ఓటమిపాలు కాబోతున్నారన్నది. ఇంకా ఆశ్చర్యపోవలసిన అంశం ఏంటంటే ఇక్కడ నిన్నటివరకు తెలుగుదేశం, జనసేనలే అనేస్థాయి నుంచి లీడ్‌లోకి వైకాపా అభ్యర్థి రావడం. గాజువాకలో వైకాపా అభ్యర్థి తిప్పల నాగిరెడ్డి ఖచ్చితంగా గెలుస్తాడనే అంచనాలు ఇచ్చింది. ఆయనకు సానుభూతి పవనాలు చాలా గట్టిగా వినిపించాయని.. బయటికి ఇతర పార్టీల్లో తిరిగినవారు కూడా పోలింగ్‌కి వచ్చేసరికి నాగిరెడ్డికి వేశారని వార్తలు వస్తున్నాయి.

2009లో స్వతంత్ర అభ్యర్థిగా బరిలోకి దిగిన నాగిరెడ్డి మంచి ఓట్లశాతాన్నే తెచ్చుకున్నారు. అటు తరువాత వైసీపీ తీర్థం పుచ్చుకున్న ఆయన 2014లో వైకాపా తరపున పోటీచేసి ఓడిపోయారు. ప్రస్తుతం తిరిగి ఆయన వైకాపా అభ్యర్థిగా బరిలోకి నిలవడం.. పవన్‌కళ్యాణ్‌కు చాలా వయసు ఉందని… ఆయన మరోసారి, మరోచోట అయినా గెలిచే అవకాశం ఉందని.. కానీ నాకు ఇక వయసు అయిపోయింది.. అఖరి ఛాన్స్‌ ఇక నేను పోటీచేయనని ప్రతి గడపకు నాగిరెడ్డి తిరిగి అభ్యర్థించడంతో ఆ సానుభూతి పవనాలు చాలా గట్టిగా వినిపించాయని బయటికి వినిపిస్తోంది.

వైకాపా కూడా ఇక్కడ చాలా ప్రతిష్టాత్మకంగా తీసుకోవడం.. దాదాపు వారంరోజుల నుంచే డబ్బు పంపకాలతో పాటు ఇతరత్రా అన్ని అవకాశాలను సమర్థవంతంగా ఉపయోగించుకుని అక్కడ లోలోపల వ్యవహారం చక్కబెట్టడం.. తెలుగుదేశం అభ్యర్థి పల్లా శ్రీనివాసరావు కూడా సహాయసహకారాలు అందించాడనే వార్తలు గుప్పుమంటున్నాయి. దీనితో గాజువాకలో ఖచ్చితంగా గెలుస్తాడనుకున్న పవన్‌కళ్యాణ్‌ ఇప్పుడు ఖచ్చితంగా నాగిరెడ్డి చేతిలో ఓడిపోతాడని తెలుస్తోంది.

తెలుగుదేశం అభ్యర్థి చంద్రబాబును తన నియోజకవర్గంలో ప్రచారానికి ఆహ్వానించినా ఆయన రాకపోవడం, లోకల్‌ నాయకులు కూడా ఆయనకు పెద్దగా సహకరించకపోవడంతో ఆయనకు విషయం అర్థమై.. లోలోపల తమ క్యాడర్‌ను అంతా వైకాపాకు అనుకూలంగా ఓటు వేసేలా ఒప్పదం కుదిరిందని అంటున్నారు. క్షేత్రస్థాయిలో ఎలాంటి విశ్లేషణలు లేకుండా అంతపెద్ద పత్రిక ఇలాంటి అతిపెద్ద కథనాన్ని ఇవ్వదని.. ఖచ్చితమైన సమాచారం లోకల్‌గా అందితేనే ఇస్తుందని అంటున్నారు.

రెండుచోట్లా పవన్‌ ఖచ్చితంగా గెలుస్తాడు.. దేన్ని వదులుతాడో అనేటువంటి వార్తలు నిన్నటి వరకు వినిపించేవి. ఇప్పుడు వార్‌ వన్‌సైడ్‌ అని తేలిపోవడంతో అటు జనసేన వర్గాలు కూడా ఈ నియోజకవర్గం విషయంలో తీవ్ర నైరాశ్యంలోకి కూరుకుపోయినట్లు వార్తలు వస్తున్నాయి. ఒకవేల ఇదే నిజమైతే జనసేన ఆశలు గాజువాకలో ఖచ్చితంగా వదులుకోవాల్నిందే.