పారెట్.. యూ ఆర్ అండర్ అరెస్ట్

‘డ్రగ్ మాఫియా పారిపోవడానికి సహకరించావ్. నేరస్థులకు సహకరించడం కూడా నేరమే. అందుకే నిన్ను అరెస్టు చేస్తున్నాం’ – ఇది ఏ వ్యక్తినో ఉద్దేశించి అన్న మాటలు కాదండోయ్. ఓ రామచిలుకను అరెస్టు చేసిన సందర్భంగా బ్రెజిల్ పోలీసుల డైలాగ్ ఇది.

ఇంతకీ విషయం ఏమిటంటే… బ్రెజిల్ లో డ్రగ్స్ అక్రమ రవాణా కార్యకలాపాలు ఎక్కువ. స్మగ్లింగ్ ముఠాలు పలు మాదక ద్రవ్యాలను అక్రమంగా రవాణా చేస్తుంటాయ్. వారిని పట్టుకోవడానికి పోలీసులు పలు ప్రయత్నాలు చేస్తుంటారు. పోలీసుల కన్నుగప్పి వారు తప్పించుకుంటుంటారు. ఈ విషయంలో స్మగ్లింగ్ ముఠాలు ఇటీవల కాలంలో కాస్త తెలివి మీరాయి. పోలీసుల కళ్లు గప్పి పారిపోవడానికి పక్షులనూ వాడుకుంటున్నాయి. ఇందుకోసం వాటికి తగిన శిక్షణ ఇచ్చి ఉపయోగించుకుంటున్నాయి.

తాజాగా ఉత్తర బ్రెజిల్ లో భారీగా కొకైన్ అక్రమ రవాణా సాగుతోందని పోలీసులకు తెలియడంతో వారు వెంటనే ఆ ప్రాంతానికి చేరుకున్నారు. స్మగ్లర్లు ఉన్న భవనంలోకి దూసుకెళ్లారు. ఈ విషయం లోపల ఉన్న స్మగ్లర్లకు తెలియలేదు. అయితే, పోలీసుల రాకను అక్కడే ఉన్న రామచిలుక పసిగట్టింది. ‘మామా.. పోలీస్’ అని గట్టిగా అరిచింది. దీంతో అక్కడున్న వారంతా మరో మార్గంలో చాకచక్యంగా తప్పించుకుని పారిపోయారు. పోలీసులు వచ్చేసరికి అక్కడ రామచిలుక తప్ప ఎవరూ లేరు.

స్మగ్లర్లు తప్పించుకోవడానికి కారణం ఆ చిలుకే అని నిర్ధారణకు వచ్చిన పోలీసులు.. వెంటనే దానిని అరెస్టు చేసి, జైలులో పెట్టారు. తాము వెళ్లేసరికి ఆ చిలుక మామా పోలీస్ అని హెచ్చరించిందని, దీంతో వారు పారిపోయారని ఈ ఆపరేషన్లో పాలుపంచుకున్న ఓ పోలీసు అధికారి వెల్లడించారు. ఇందుకోసం దానికి శిక్షణ ఇచ్చినట్టు తెలుస్తోందని పేర్కొన్నారు. అయితే, చిలుకను అరెస్టు చేసిన పోలీసులు ఎన్ని ప్రయత్నాలు చేసినా దాని నుంచి ఎలాంటి వివరాలూ రాబట్టలేకపోయారట. ఎంతసేపు అడిగినా, అది నిశ్శబ్దంగానే ఉందని, నోరు తెరచి ఒక్క మాట కూడా మాట్లాడలేదని స్థానిక పత్రికలు వెల్లడించాయి.

ఎంతో మంది పోలీసు అధికారులు వచ్చి, అడిగినా ఆ చిలుక సైలెంట్ గానే ఉందని అలెగ్జాండర్ క్లార్క్ అనే స్థానిక వెటర్నరీ డాక్టర్ తెలిపారు. మరోవైపు చిలుకను అరెస్టు చేయడం పట్ల జంతు ప్రేమికులు భగ్గుమన్నారు. అమాయక మూగజీవాలను అలా అరెస్టు చేయడం సబబు కాదని, వెంటనే దానిని వదిలిపెట్టాలంటూ డిమాండ్లు వెల్లువెత్తాయి. చిలుక ఒక్క మాట కూడా మాట్లాడకపోవడం, జంతు ప్రేమికుల ఆందోళనలు పెరగడంతో పోలీసు అధికారులు ఆ చిలుకను స్థానిక జూకి తరలించారు. అక్కడ మూడు నెలలపాటు దానికి ఎగరడంలో శిక్షణ ఇచ్చిన తర్వాత వదిలిపెడతారు.

బ్రెజిల్ లో స్మగ్లర్లు తమ కార్యకలాపాలకు జంతువులను వినియోగించడం ఇటీవల కాలంలో బాగా పెరిగింది. అయితే, వాటికి శిక్షణ ఇచ్చి తమను హెచ్చరించే విధంగా ఇలా ఉపయోగిచడం మాత్రం ఇదే తొలిసారని అధికారులు చెబుతున్నారు. 2008లో పోలీసులు ఓ స్మగ్లర్ల డెన్ పై దాడి చేసినప్పుడు రెండు మొసలి పిల్లలు దొరికాయి. తమ శత్రువులను వాటికి ఆహారంగా వేసేవారని అప్పట్లో ఆరోపణలు వచ్చాయి. అయితే, వాటిని ఓ గ్యాంగ్ స్టర్ తండ్రి తోసిపుచ్చారు. తన కొడుకు ఓసారి అలా చేయడానికి ప్రయత్నించినా, అవి మానవ మృతదేహాలను తినడానికి ఆసక్తి చూపలేదని చెప్పారు.