జగన్ గారు.. ఇది కేవలం నిలిపివేత మాత్రమే.. రద్దు కాదు: ఎన్నికల కమిషనర్ ఎన్.రమేష్

ఆంధ్రప్రదేశ్‌లో స్థానిక సంస్థల ఎన్నికల హడావుడికి ఒక్కసారి బ్రేక్ పడింది. ఈ ఎన్నికలను ఆరు వారాల పాటు వాయిదా వేస్తున్నట్లు రాష్ట్ర ఎన్నికల కమిషన్ నిర్ణయం తీసుకుంది. దీంతో.. ఏపీ ముఖ్యమంత్రి జగన్ మోహన్ రెడ్డి తీవ్ర అసంతృప్తి చెందారని ఆ పార్టీ నాయకులు తెలిపారు. అయితే.. ఎన్నికలు వాయిదా పడినట్లు తెలుసుకున్న సీఎం జగన్ మోహన్ రెడ్డి వెంటనే రాజ్‌ భవన్‌ కు వెళ్లారు. అనంతరం ఈ విషయమై గవర్నర్ బిశ్వభూషణ్ హరిచందన్‌ తో భేటీఅయ్యారు. ఆ సమావేశం సుమారు గంటపాటు కొనసాగిందని సమాచారం.

అయితే సమావేశంలో కరోనా నివారణకు ప్రభుత్వం తీసుకుంటున్న చర్యలను వివరించారు. అలానే స్థానిక సంస్థల ఎన్నికలు వాయిదా గురించి మాట్లాడారు. కాగా., ఈ సమావేశంలో రాష్ట్ర ప్రభుత్వ అడ్వొకేట్ జనరల్ కూడా పాల్గొన్నారు. దీంతో ఈ భేటీకి కాస్త ప్రాధాన్యత సంతరించుకుంది. ఇటీవల నియమించిన రాష్ట్ర ఎన్నికల కమిషనర్ నిమ్మగడ్డ రమేష్ కుమార్ పై గవర్నర్ బిశ్వభూషణ్ కు సీఎం జగన్ ఫిర్యాదు చేసారని తెలిసింది. రాష్ట్ర స్థానిక సంస్థల ఎన్నికలను కనీసం ప్రభుత్వంతో సంప్రదించకుండా ఎలా వాయిదా వేస్తారని జగన్ అభ్యంతరం తెలిపినట్టు తెలుస్తోంది.

ఏపీలో ఆరు వారాల పాటు స్థానిక సంస్థల ఎన్నికలను వాయిదా వేసిన రాష్ట్ర ఎన్నికల కమిషనర్ ఎన్.రమేష్ కుమార్ ఈ సందర్భంగా కీలక వ్యాఖ్యలు చేశారు. ఎన్నికలు జరపడం ముఖ్యమైనా.., కానీ.. ప్రజాభద్రతను దృష్టిలో ఉంచుకుని వారిని పణంగా పెట్టకూడదనే వాదనతో ఎన్నికల కమిషన్ ఏకీభవించిందని ఆయన పేర్కొన్నారు.

కానీ.. ఇప్పటికివరకు ఎన్నికలకు సంబంధించిన ఏర్పాట్లు కొన్ని పూర్తయ్యాయని అన్నారు. మేము అన్ని ఏర్పాట్లు.. సిబ్బంది, భద్రతా గురించిన ఏర్పాట్లు పూరి చేశామని, కానీ.. ఇప్పుడున్న పరిస్థితుల్లో.. ఇప్పుడున్న వాతావరణంలో రాజ్యాంగం ద్వారా, పంచాయతీ రాజ్ చట్టం ద్వారా విచక్షణ అధికారాల మేరకు ఎన్నికల ప్రక్రియను ఆరు వారాల పాటు నిలిపివేస్తున్నామని ఆయన అన్నారు. జగన్ గారు.. ఇది కేవలం నిలిపివేత మాత్రమే.. రద్దు చేయటం లేదంటూ.. రాష్ట్ర ఎన్నికల కమిషనర్ ఎన్.రమేష్ కుమార్ ప్రకటించారు.