‘నాగార్జున( Nagarjuna) సర్ మీకు ఏమైంది? ఎందుకు ఈ మధ్య డీలా పడిపోయారు? టాలీవుడ్ లో 4 స్తంభాలుగా చెప్పుకునే చిరంజీవి, బాలకృష్ణ, వెంకటేష్ లు వరుస సినిమాలతో దూసుకుపోతుంటే.. మీరు ఎందుకు సైలెంట్ అయ్యారు?.. మీలో ‘గీతాంజలి’ లోని ప్రకాష్ ని చూడాలని ఉంది. ‘శివ’ లాగా కనిపించినా సరే. ‘హలో బ్రదర్’ గా వచ్చినా మాకు ఓకే. పోనీ ‘నిన్నే పెళ్ళాడతా’ లో శీను గా రండి. లేకుంటే అప్పటి రాఘవేంద్రరావు సినిమాలలో అల్లరిగా రండి. అదీ కాకుంటే ‘ఎదురులేని మనిషి’లా గంభీరంగా రండి. సినిమా చూసి హిట్ చేసేస్తాం.
‘డాన్’ గానో ‘గ్రీకువీరుడు’ గానో కనిపించండి. చూసి తరిస్తాం. వయసు గురించి ఆలోచించకండి. మీరు ఎప్పటికీ నవ’మన్మధుడే’. మీరు ఈ వయసులో ‘మాస్’ గా కనిపించిన ‘సూపర్’ గా ఉంటారు. ‘శ్రీరామదాసు’ల దర్శనమిచ్చినా చాలు. ‘బాస్ ఐ లవ్ యూ’అంటాం. ఎందుకంటే మీరు ఎప్పుడూ మా ‘కింగే’. మీ లేడీ ఫ్యాన్స్ అందరూ ‘సోగ్గాడే చిన్నినాయన’ అని మీ గురించే పాడుకుంటున్నారు. ‘ఆఫీసర్’, ‘ఘోస్ట్’ లా కాకుండా ‘బంగార్రాజు’ లా కనిపించమని అడుగుతున్నారు. ‘పడుచందం పక్కనుంటే పడిపోదా పురుష జన్మ’ అని 60 ఏళ్ల వయసులో మీరు హీరోయిన్ ని ఉద్దేశించి పాడుతుంటే చూసి విజిల్స్ కొట్టింది మేమే కదా. కాబట్టి వీటన్నింటినీ తలదన్నేలా మీరు వందో సినిమా చేసేయండి. ‘వైల్డ్ డాగ్’ లా బాక్సాఫీస్ ని వేటాడేద్దాం. మీకు మేమున్నాం. పాత నాగ్ ని బయటకు తీయండి. మీకు బ్రహ్మరథం పట్టడానికి మేం సిద్ధంగా ఉన్నాం’…. ఇదీ సగటు నాగార్జున అభిమాని ఆవేదన.
ఇందులో అక్షరం కూడా తప్పులేదు. తన సమకాలీన నటులు చిరంజీవి, బాలకృష్ణ, వెంకటేష్ తమ వయసుకు తగ్గ కాన్సెప్ట్ తో, పాత్రలతో దూసుకెళ్తున్నారు. నాగార్జున మాత్రం కొన్నాళ్ళుగా సరైన హిట్ లేక వెనకబడిపోయారు. ఆయనకు.. ఆయన స్థాయికి తగ్గ హిట్ పడి దాదాపు 10 ఏళ్ళు అవుతోంది. 2014లో వచ్చిన ‘సోగ్గాడే చిన్నినాయన’ తో హిట్ అందుకున్న నాగ్.. ఇప్పటివరకు ఆయన ఖాతాలో మరో హిట్ లేదు. గతేడాది ‘బంగార్రాజు’ రూపంలో హిట్ దొరికినా అందులో నాగచైతన్య కూడా ఉండటంతో ఆ క్రెడిట్ పూర్తిగా నాగార్జునకే ఇచ్చేయలేం. ఆయన తన కెరీర్ ని పక్కన పెట్టి కొడుకులు నాగచైతన్య( Naga Chaitanya), అఖిల్( Akhil) భవిష్యత్తును చక్కదిద్దే పనిలో ఉన్నారని టాక్ వినిపిస్తోంది.
ప్రస్తుతం ఆయన వయసు 63 సంవత్సరాలు. ఇక సినిమాలను పూర్తిగా పక్కన పెట్టేసినట్టేనా? వ్యక్తిగత జీవితానికి ప్రాధాన్యం ఇస్తున్నారా? అనే చర్చ జరుగుతున్నా.. అందులో నిజం లేదని తన వందో సినిమాని చాలా ప్రత్యేకంగా ఉండేలా.. భారీ బడ్జెట్ తో సెట్ చేసుకున్నారని.. ఆ సినిమాకి రైటర్ ప్రసన్నకుమార్ దర్శకత్వం వహిస్తారని ఆయన సన్నిహితులు చెబుతున్నారు. ఈ ఈ సినిమాతో అయినా నాగార్జున మాసివ్ హిట్ కొట్టి అభిమానుల ఆవేదనని చల్లారుస్తారేమో చూడాలి.