చైతూ, సామ్‌ అయిదవ సారి కలయిక

నాగచైతన్యకు మొదటి సక్సెస్‌ ఏమాయ చేశావే. ఆ సినిమాతో సమంత హీరోయిన్‌గా పరిచయం అయిన విషయం తెల్సిందే. ఆ తర్వాత ఆటో నగర్‌ సూర్య, మనం చిత్రాల్లో కలిసి నటించారు. మనం మంచి హిట్‌ అవ్వగా ఆటో నగర్‌ సూర్య చిత్రం నిరాశ పర్చింది. ఇక వీరిద్దరి సుదీర్ఘ ప్రేమను పెళ్లి వరకు తీసుకు వెళ్లారు. పెళ్లి తర్వాత వీరిద్దరు కలిసి నటించాలని అంతా అనుకున్నారు. ముఖ్యంగా అక్కినేని ఫ్యాన్స్‌ను మెప్పించే విధంగా మజిలీ చిత్రంలో వీరిద్దరు నటించారు.

మజిలీ చిత్రం వీరిద్దరు కలిసి నటించడం వల్ల మంచి సక్సెస్‌ను దక్కించుకుంది. దాంతో వీరిద్దరి జంటకు భారీ క్రేజ్‌ ఏర్పడినది. అందుకే మళ్లీ మళ్లీ వీరిద్దరిని కలిపి చూపించాలని మేకర్స్‌ ఆశపడుతున్నారు. సినీ వర్గాల ద్వారా అందుతున్న తాజా సమాచారం ప్రకారం మళ్లీ వీరిద్దరు కలిసి నటించబోతున్నారట. వీరిద్దరిని నందిని రెడ్డి కలపబోతుందని, అందుకు సంబంధించిన స్క్రిప్ట్‌ వర్క్‌ కూడా జరుగుతోందని సమాచారం అందుతోంది. నందిని రెడ్డి దర్శకత్వంలో సమంత నటించిన ఓ బేబి చిత్రం మంచి విజయాన్ని సొంతం చేసుకుంది.

నందిని రెడ్డితో సమంతకు మంచి స్నేహం ఉంది. ఆ కారణంగానే చైతూతో కలిసి ఆమె దర్శకత్వంలో నటించేందుకు సమంత ఆసక్తిగా ఉన్నట్లుగా తెలుస్తోంది. మొదట సమంత ప్రధాన పాత్రలో నందిని రెడ్డి సినిమా అనుకుందట. అందులో కీలకమైన గెస్ట్‌ రోల్‌ను నాగచైతన్యతో చేయించాలని అనుకున్నారు. ఆ తర్వాత నాగచైతన్య పాత్ర పరిధి పెంచినట్లుగా చెబుతున్నారు. ప్రస్తుతం చైతూ చేస్తున్న సినిమాలు పూర్తి అయిన తర్వాత నందిని రెడ్డి దర్శకత్వంలో సమంతతో కలిసి ఆయన నటించబోతున్నట్లుగా తెలుస్తోంది.