ఆసీస్ టూర్ ఎన్నో పాఠాలు నేర్పింది.. వారిద్దరి సహకారం మరువలేనిది: క్రికెటర్ సిరాజ్

‘ఆస్ట్రేలియా గడ్డపై వికెట్‌ తీసుకున్న ప్రతిసారీ నాన్నే గుర్తొచ్చారు. నేను ఈస్థాయికి రావడానికి నాన్న ప్రోత్సాహమే కారణం. ఆస్ట్రేలియాపై నా ప్రదర్శన నాన్నకే అంకితం’ అని టీమిండియా బౌలర్‌, హైదరాబాదీ మహ్మద్‌ సిరాజ్‌ ఉద్వేగానికి లోనయ్యాడు. టూర్‌ ముగించుకుని హైదరాబాద్ చేరుకున్న సరాజ్.. విమానాశ్రయం నుంచి నేరుగా తండ్రి మహ్మద్‌ గౌస్‌ సమాధిని సందర్శించి నివాళులు అర్పించాడు. అనంతరం టూర్ విశేషాలపై మీడియాతో మాట్లాడాడు..

ఆసీస్‌ విజయం వెలకట్టలేనిది. ఆస్ట్రేలియా టూర్ ఎన్నో అనుభవాలను నేర్పడమే కాదు.. జ్ఞాపకాలను కూడా మిగిల్చింది. ఒత్తిడి ఉన్న సమయాల్లో ఆటపై మాత్రమే దృష్టి సారించాలని కోహ్లీ భాయ్ చెప్పిన మాటలు నాలో ఆత్మవిశ్వాసం నింపాయి. టెస్టు క్రికెట్ ఎంతో విభిన్నమైంది. ఆసీస్ తో టూర్ ఎంతో సంతోషాన్నిచ్చింది. టీమిండియాకు ఆడుతున్నాననే విషయాన్ని గుర్తెరిగి ఆడాను.

సీనియర్లు లేకపోవడంతో నాలుగో టెస్టులో కాస్త ఆందోళనకు గురైన మాట వాస్తవమే. బుమ్రా మద్దతు, ఆజ్యింక రెహానే నాపై పెట్టుకున్న నమ్మకం నాకు స్వేచ్ఛనిచ్చాయి. నా ప్రదర్శనను అజ్జూ భాయ్ మెచ్చుకున్నాడు. కోహ్లి భాయ్‌ కెప్టెన్సీని ఎంతగా ఎంజాయ్‌ చేశానో.. అజ్జూ భాయ్‌ కెప్టెన్సీలో కూడా అంతే ఎంజాయ్ చేశాను. కీలక సమయంలో మార్నస్‌ లబుషేన్‌ వికెట్ తీయడం నాకెంతో ప్రత్యేకం.

ఇంటి భోజనం చేయడం సంతృప్తిగా ఉంది. రిలాక్స్‌ అయ్యేది లేదు. మేనేజ్‌మెంట్‌ ఎలా చెప్తే అలానే. ఆసీస్‌ విజయం ఇచ్చిన విశ్వాసంతో ముందుకు వెళ్తాను. మనసు పెట్టి ఆడతాను. ఆటపై మరింత గౌరవం పెరిగింది. నా కుటుంబం, స్నేహితులు, అభిమానులు ఎంతో సపోర్ట్ ఇచ్చారు. ఇకపై కూడా వారి మద్దతు కావాలి’ అన్నాడు. ఈ టెస్టు సిరీస్‌లో సిరాజ్‌ మొత్తం 13 వికెట్లు తీసాడు. ముఖ్యంగా గబ్బాలో ఆసీస్‌ పై రెండో ఇన్నింగ్స్‌లో 5 వికెట్లు తీసి విజయంలో కీలకపాత్ర పోషించాడు. జాత్యహంకార వ్యాఖ్యలు కూడా ఎదుర్కొని ధీటుగా నిలిచాడు సిరాజ్.