తెలంగాణ ఆర్టీసీ ఖేల్‌ ఖతమ్‌: స్పష్టం చేసిన కేసీఆర్‌

తెలంగాణ ఆర్టీసీ ఖేల్‌ ఖతమ్‌ అయిపోయిందని తెలంగాణ ముఖ్యమంత్రి కల్వకుంట్ల చంద్రశేఖర్‌రావు ప్రకటించేశారు. ఇప్పుడున్న పరిస్థితుల్లో ఆర్టీసీని ఉద్ధరించడం సాధ్యం కాదనీ, ఆర్టీసీని బాగు చేయడమంటే.. ఆర్టీసీని పూర్తిగా అంతమొందించడమేననే సంకేతాలిచ్చేశారు. ‘ఆర్టీసీ చచ్చిపోయింది.. ఆర్టీసీని యూనియన్లే చంపేశాయి.. యూనియన్లనేవి లేకుండా వుంటే.. సింగరేణి కార్మికులకు దసరా బోనస్‌ ఇచ్చినట్లు.. ఆర్టీసీ కార్మికులు కూడా రెండేళ్ళలోనే లక్ష రూపాయల బోనస్‌ అందుకునే పరిస్థితి వస్తుంది..’ అని కేసీఆర్‌ వ్యాఖ్యానించడం గమనార్హం.

‘ఆర్టీసీ అనేది కార్పొరేషన్‌.. దానికి సంబంధించిన గొడవలు లేబర్‌ డిపార్ట్‌మెంట్‌లో పరిష్కరించుకోవాలి. సంస్థ జీతాలు ఇచ్చే పరిస్థితుల్లో లేదు గనుక రెండు మూడు బస్టాండ్లను అమ్మేయాలి..’ అంటూ కేసీఆర్‌ తనదైన స్టయిల్లో వ్యాఖ్యానించారు. హుజూర్‌నగర్‌ ఉప ఎన్నికలో ఘనవిజయం సాధించిన తర్వాత మీడియా ముందుకొచ్చిన కేసీఆర్‌, ఆర్టీసీ సమ్మెపై విరుచుకుపడిపోయారు. సమ్మె చట్ట విరుద్ధమని కేసీఆర్‌ చెప్పుకొచ్చారు. ‘దిక్కుమాలిన సమ్మె’ అన్నారు.. ఇంకేవేవో అనేశారు.

ఆర్టీసీకి దసరా పండుగ మంచి సీజన్‌ అనీ, ఆ సమయంలో సమ్మె చేసి, కార్మికులే ఆర్టీసీని నిండా ముంచేశారనీ కేసీఆర్‌ అన్నారు. కానీ, ఆర్టీసీ కార్మికుల వాదన ఇంకోలా వుంది. తెలంగాణ ఉద్యమ కాలంలో ఆర్టీసీ ఉద్యోగుల్ని కేసీఆర్‌ వాడుకున్నారనీ.. అప్పుడూ పండుగల సమయంలో సమ్మె చేశామనీ, అప్పుడు లేని నష్టం ఇప్పుడెలా వచ్చిందని పదే పదే ఆర్టీసీ కార్మికులు డైరెక్ట్‌గా కేసీఆర్‌ మీద ఎటాక్‌ చేస్తున్న విషయం విదితమే.

‘ప్రైవేటు ట్రావెల్స్‌ ఎందుకు లాభాల్లో వుంటున్నాయి.?’ అని కేసీఆర్‌ పదే పదే ప్రశ్నించడం చూస్తోంటే, అతి త్వరలో ఆర్టీసీ తన మనుగడని కోల్పోవడమే కాదు.. ఏ ప్రైవేటు సంస్థకో అప్పగించేయబడ్తుందన్న విషయం సుస్పష్టమవుతుంది.