జీవిత.. అప్పుడు సారీ చెప్పి, ఇప్పుడు రివర్స్‌ గేర్‌ వేసి.!

సినీ నటి, నిర్మాత, దర్శకురాలు జీవిత, మూవీ ఆర్టిస్ట్స్‌ అసోసియేషన్‌ అధ్యక్షుడు నరేష్‌పై మరో మారు గుస్సా అయ్యారు. మొన్నీమధ్యనే ఓ ప్రెస్‌ మీట్‌లో రాజశేఖర్‌ ‘లొల్లి’ చేయడం, దాన్ని కవర్‌ చేస్తూ జీవిత, తన భర్త తరఫున క్షమాపణ చెప్పడం తెల్సిన విషయాలే. అనంతరం రాజశేఖర్‌, ‘మా’ పదవికి రాజీనామా చేశారు కూడా. అయితే, ఆ రాజీనామా వ్యక్తిగత కారణాలతో చేసింది కాదనీ, ‘మా’ అధ్యక్షుడు నరేష్‌ వ్యవహార శైలి నచ్చకపోవడంతోనే రాజశేఖర్‌ రాజీనామా చేయాల్సి వచ్చిందంటూ తాజాగా జీవిత ఇచ్చిన వివరణ మళ్ళీ ‘మూవీ ఆర్టిస్ట్స్‌ అసోసియేషన్‌’లో కలకలం రేపుతోంది.

‘సినీ పరిశ్రమలో మంచిని మైకులో చెప్పాలి.. చెడు గురించి చెవిలో చెప్పుకోవాలి..’ అని మెగాస్టార్‌ చిరంజీవి, పరిశ్రమ పెద్దగా ఇచ్చిన సూచన చాలా గొప్పదంటూ అప్పట్లో కితాబులిచ్చిన జీవిత, మళ్ళీ ఇప్పుడు రివర్స్‌ గేర్‌ వేయడం గమనార్హం.

చిరంజీవి మాత్రమే కాదు, కృష్ణంరాజు, మోహన్‌బాబు, మురళీమోహన్‌ తదితరులూ రాజశేఖర్‌ ‘ఓవరాక్షన్‌’పై మండిపడుతూ క్లాస్‌ తీసుకునేసరికి, జీవిత అందరికీ క్షమాపణ చెప్పింది. సినీ పరిశ్రమలో గొడవలేమీ వుండవనీ, తామంతా ఒకే ఒకే కుటుంబమనీ చెప్పుకొచ్చారు. కానీ, ఇప్పుడు మళ్ళీ ఆమె ఎందుకు గుస్సా అవుతున్నట్లు.?

నరేష్‌పై ‘మూవీ ఆర్టిస్ట్స్‌ అసోసియేషన్‌’లో చాలామంది అసంతృప్తితో వున్నారనీ, ఆయనపై చర్యల విషయమై ఇప్పటికే పలుమార్లు డిమాండ్‌ చేశామనీ, పరిశ్రమ పెద్దలు తీసుకునే నిర్ణయం కోసం వేచి చూస్తున్నామనీ జీవిత బాంబు పేల్చారు. ఒక్కటిమాత్రం నిజం. ప్రస్తుతానికి నరేష్‌ని సినీ పిరశ్రమ పెద్దల్లో దాదాపు అందరూ సపోర్ట్‌ చేస్తున్నారు. సో, జీవిత ఎంత యాగీ చేసినా ప్రయోజనం లేదు.