రాజశేఖర్ చిన్నపిల్లాడు: జీవిత

మూవీ ఆర్టిస్ట్స్ అసోసియేషన్ (మా) డైరీ ఆవిష్కరణ కార్యక్రమంలో రాజశేఖర్ కారణంగా రేగిన విభేదాలను ఆయన భార్య జీవిత చల్లబరిచేందుకు ప్రయత్నించారు. చిరంజీవితో రాజశేఖర్ వాగ్వాదం చేయడం.. దీనిపై చిరంజీవి తీవ్రంగా స్పందించడం.. మళ్లీ రాజశేఖర్ వచ్చి విమర్శలు చేసి బయటకు వెళ్లిపోవడంతో కార్యక్రమంలో కలకం రేగింది. దీంతో రాజశేఖర్ పై క్రమశిక్షణ చర్యలు తీసుకోవాలని చిరంజీవి, కృష్ణంరాజు సూచించడంతో ఇందుకు ఓ యాక్షన్ కమిటీని ఏర్పాటు చేస్తున్నట్టు మా అధ్యక్షుడు నరేష్ ప్రకటించారు.

అనంతరం జీవిత వేదిక పైకి వచ్చి రాజశేఖర్ ఎపిసోడ్ కు ముగింపు పలికే ప్రయత్నం చేశారు. చిరంజీవి, మోహన్ బాబు వంటి పెద్దల నుంచి తాను ఎంతో నేర్చుకున్నానని చెప్పారు. మా అభివృద్ధి కోసం చిరంజీవి చాలా సమయం కేటాయించి సహకరించారని, అందుకు ధన్యవాదాలని చెప్పారు.

ఇక రాజశేఖర్ చిన్నపిల్లవాడు అని, ఆయనతో 25 ఏళ్లుగా జీవిస్తున్న ఆయన భార్యగా ఈ విషయం చెబుతున్నానని పేర్కొన్నారు. రాజశేఖర్ కి మనసులో ఏదీ దాచుకోవడం రాదని, మనసులో ఉన్నది మాట్లాడేస్తారని చెప్పారు. ఈ విషయాన్ని పట్టించుకోవద్దని, చిరంజీవిగారు చెప్పినట్టుగా మా సభ్యులంతా కలిసే పని చేస్తామని స్పష్టంచేశారు.

ఈ విషయాన్ని ఇంతటితో వదిలేద్దామని, ప్రపంచంలోనే అతి గొప్ప అసోసియేషన్ గా మా ని తీర్చి దిద్దేందుకు అందరం కలసి కృషి చేస్తామని పేర్కొన్నారు. తమను ముందుండి నడిపించాలని చిరంజీవిని కోరారు. మొత్తానికి రాజశేఖర్ ఎపిసోడ్ జీవిత ఎంట్రీతో సద్దుమణిగినట్టే కనిపించింది. అనంతరం చిరంజీవి మాట్లాడుతూ.. రాజశేఖర్ ఎపిసోడ్ ను మీడియా మిత్రులు కూడా అంతగా పట్టించుకోవద్దని కోరారు.