అవును, అందుకే ఆయన మెగాస్టార్‌ చిరంజీవి.!

మూవీ ఆర్టిస్ట్స్‌ అసోసియేషన్‌.. దీని గురించి చాలామంది సాధారణ ప్రజానీకానికి తెలియదు. సినీ అభిమానులకీ పెద్దగా పరిచయం లేని సంస్థ ఇది. ఒకప్పుడు సినీ పరిశ్రమలోనే ఎవరూ దీన్ని పట్టించుకునేవారు కాదు. కానీ, ఈ మధ్య సాధారణ రాజకీయాల్ని మించి, సినిమా రాజకీయాల పట్ల సినీ అభిమానుల్లో ఆసక్తి పెరిగిపోయిందంటే, ఆ స్థాయిలో ‘మూవీ ఆర్టిస్ట్స్‌ అసోసియేషన్‌’ ఎన్నికల సందర్భంగా రాజకీయాలు తెరపైకొస్తున్నాయి.. అదీ అత్యంత జుగుప్సాకరంగా.

ఆ చెత్త సంస్కృతికి ఫుల్‌ స్టాప్‌ పెట్టే ప్రక్రియకు మెగాస్టార్‌ చిరంజీవి సహా సినీ పరిశ్రమ పెద్దలు మళ్ళీ శ్రీకారం చుట్టాల్సి వస్తోంది. ‘మనమంతా తెలుగు సినీ కళామతల్లి బిడ్డలం..’ అంటూ పదే పదే చిరంజీవి ‘మా’ అసోసియేషన్‌కి సూచిస్తున్నారు. ‘మంచిని మైకులో చెబుదాం.. చెడు గురించి చెవిలో చర్చించుకుందాం..’ అని చిరంజీవి తాజాగా సెలవిచ్చారు. ఈలోగా రాజశేఖర్‌ వచ్చి నానా యాగీ చేశాడు. చిరంజీవికి చాలా కోపమొచ్చింది. రాజశేఖర్‌ తీరుని ఖండించారు. కానీ, ఆ తర్వాత మీడియాని ఉద్దేశించి చిరంజీవి ఆసక్తికరమైన ‘విజ్ఞప్తి’ చేయడం గమనార్హం.

‘కుటుంబంలో చిన్న చిన్న అపార్ధాలు మామూలే.. సినీ పరిశ్రమ కూడా అంతే. దయచేసి రాజశేఖర్‌ ఎపిసోడ్‌ని మీడియా పెద్దది చేసి చూపొద్దు. అలాదని, మిమ్మల్ని ఆదేశించలేను. వినమ్రంగా విజ్ఞప్తి మాత్రమే చేస్తున్నాను..’ అంటూ చిరంజీవి వ్యాఖ్యానించడంతో అక్కడున్నవారంతా అవాక్కయ్యారు.

‘అవును, అందుకే ఆయన మెగాస్టార్‌ చిరంజీవి అయ్యారు..’ అంటూ పలువురు సినీ ప్రముఖులు, పాత్రికేయులు కూడా ఒకరితో ఒకరు చెప్పుకోవడం కన్పించింది. రాబోయే దశాబ్ద కాలంలో ‘మా’ అభివృద్ధికి చేపట్టాల్సిన చర్యల గురించి చిరంజీవి తన విలువైన సూచనల్ని అందించడం, దానికి సినీ పరిశ్రమ పెద్దలు హర్షం వ్యక్తం చేయడం జరిగింది. రెండు తెలుగు రాష్ట్రాల్లోని ప్రభుత్వాధినేతలతో తాను కలిసినప్పుడు సినీ పరిశ్రమ అభివృద్ధి గురించి మాట్లాడిన విషయాల్నీ చిరంజీవి ఈ వేదికపై పంచుకున్నారు.