ఆంధ్రా మౌన ముని.. వైఎస్‌ జగన్‌.!

‘మౌన ముని’గా రాజకీయాల్లో పేరు తెచ్చుకున్నారు భారత మాజీ ప్రధాని మన్మోహన్‌ సింగ్‌. అయితే, ఆయన మీద ఒక్క అవినీతి ఆరోపణ కూడా రాలేదు. కానీ, సోనియా చేతిలో కీలుబొమ్మ.. అనే విమర్శల్ని ఆయన బాగానే ఎదుర్కొనాల్సి వచ్చింది. ఆంధ్రప్రదేశ్‌ రాజకీయాలకు సంబంధించి ‘మౌన ముని’ అనే పేరు ఇప్పుడు వైఎస్‌ జగన్‌ మోహన్‌రెడ్డికి ఆపాదిస్తున్నారు వివిధ రాజకీయ పార్టీలకు చెందిన నేతలు. గ్రామ / వార్డు సచివాలయ ఉద్యోగాలకు సంబంధించి ఇటీవల నిర్వహించిన పరీక్ష, వెల్లడించిన ఫలితాలపై పెద్దయెత్తున దుమారం రేపుతోన్న విషయం విదితమే.

అయినా, ఇప్పటిదాకా ముఖ్యమంత్రి వైఎస్‌ జగన్‌ మోహన్‌రెడ్డి నుంచి స్పందన లేదు. అమరావతి విషయంలో కావొచ్చు, పోలవరం ప్రాజెక్టు విషయంలో కావొచ్చు.. ముఖ్యమంత్రి వైఎస్‌ జగన్‌ మోహన్‌రెడ్డి పెదవి విప్పకపోతుండడం అందర్నీ విస్మయానికి గురిచేస్తోంది. అధికార పార్టీ నేతలు సైతం జగన్‌ తీరుపై ఆశ్చర్యం వ్యక్తం చేస్తున్నారు. ముఖ్యమైన విషయాలపై విమర్శలొస్తున్నప్పుడు ప్రభుత్వాధినేత స్పందించి తీరాల్సిందే. ఈ వాదనతో వైసీపీ నేతలు సైతం ఏకీభవించాల్సి వస్తోంది.

గోదావరిలో బోటు మునిగి 50 మందికి పైగా ప్రాణాలు కోల్పోతే, తూతూ మంత్రం సమీక్షతో సరిపెట్టిన వైఎస్‌ జగన్‌, ఆ తర్వాత మళ్ళీ మీడియా ముందుకు రాకపోవడం, బాధిత కుటుంబాలకు భరోసా ఇచ్చే ప్రయత్నం సైతం చేయకపోవడం విమర్శలకు తావిస్తోంది.

‘ప్రతిసారీ మమ్మల్నే మీడియా ముందుకు పంపుతున్నారు.. మీ ముఖ్యమంత్రి ఎక్కడ దాక్కున్నారన్న ప్రశ్నకు సమాధానం చెప్పలేకపోతున్నాం..’ అంటూ వైసీపీకి చెందిన ఓ సీనియర్‌ నేత, ఆఫ్‌ ది రికార్డ్‌గా తన ఆవేదనను వెల్లగక్కుతున్నారు. ‘ఆయనకు మేం ఏ విషయమ్మీదా సూచనలు ఇచ్చే పరిస్థితి లేదు. ప్రజాస్వామ్యంలో ఇలాంటి పరిస్థితి ఆహ్వానించదగ్గది కాదు..’ అంటూ ఓ సీనియర్‌ నేత (మంత్రి కూడా) తన సన్నిహితుల వద్ద వాపోతున్నారట.