విశాఖలో చిరంజీవి భూములు కొన్నారా.? కొనబోతున్నారా.?

మెగాస్టార్‌ చిరంజీవి, ఇప్పుడు ఆంధ్రప్రదేశ్‌ రాజకీయాల్లో హాట్‌ టాపిక్‌గా మారారు. గతంలో ప్రజారాజ్యం పార్టీని స్థాపించిన చిరంజీవి, ఆంధ్రప్రదేశ్‌లో చెప్పుకోదగ్గ స్థాయిలో ఓటు బ్యాంకు అయితే సాధించారుగానీ, రెండు చోట్ల పోటీ చేసి, ఓ చోట ఓడిపోయారు. 18 మంది ఎమ్మెల్యేలు మొత్తంగా ఉమ్మడి రాష్ట్రంలో ప్రజారాజ్యం పార్టీ నుంచి గెలిచారు. అది గతం.

ఆ తర్వాత ఆయన కాంగ్రెస్‌ పార్టీలో ప్రజారాజ్యాన్ని విలీనం చేసి, ఎమ్మెల్యే పదవికి రాజీనామా చేసి, రాజ్యసభకు ఎంపికై, కేంద్ర మంత్రి పదవి చేపట్టి.. రాజ్యసభ సభ్యత్వం ముగిశాక ప్రత్యక్ష రాజకీయాలకు పూర్తిగా దూరమయ్యారు. తిరిగి సినిమాల్లో బిజీ అయిపోయిన చిరంజీవి, ఆంధ్రప్రదేశ్‌ రాజధానులపై చేస్తున్న ప్రకటనలతో వార్తల్లోకెక్కారు.

విశాఖలో చిరంజీవి భూములు కొనుగోలు చేశారనీ, ఫిలింసిటీ కట్టబోతున్నారనీ, ఈ నేపథ్యంలోనే ఆయన ముఖ్యమంత్రి వైఎస్‌ జగన్‌ పంచన చేరారనీ రాజకీయ వర్గాల్లో గుసగుసలు విన్పిస్తున్నాయి. నిజానికి, విశాఖలో చిరంజీవి ఫిలింసిటీ కట్టబోతున్నారన్న ప్రచారం ఈనాటిది కాదు.

చాలాకాలం క్రితం ప్రముఖ నిర్మాత డి.రామానాయుడు విశాఖలో భూములు కొనుగోలు చేశారు.. స్టూడియో నిర్మించే పనులూ చేపట్టారు. అప్పుడే విశాఖలో చిరంజీవి కూడా భూములు కొనుగోలు చేసి, ఫిలింసిటీ నిర్మాణం చేపట్టాలనుకున్నారట. కానీ, ఆ తర్వాత ఆ ఆలోచన అలా అలా వెనక్కి వెళ్ళిపోయిందంటారు సినీ పరిశ్రమలో చాలామంది. ఆనాటి ఆ విషయాల్ని, ఇప్పుడు రాజధానుల ఎపిసోడ్‌లో లింక్‌ చేసి, మెగాస్టార్‌ చిరంజీవిని వివాదాల్లోకి లాగుతున్నారు కొందరు ఔత్సాహికులు.

అయితే, ఈ ప్రచారాన్ని ఉత్తుత్తి ప్రచారంగానూ కొట్టి పారేయలేని పరిస్థితి. ఎందుకంటే, చిరంజీవి చుట్టూ ఇంత పెద్దయెత్తున రచ్చ జరుగుతున్నా.. ఆయన మీడియా ముందుకొచ్చి ఎలాంటి ప్రకటనా చేయడంలేదు. మీడియాకి ఆయన ప్రెస్‌నోట్స్‌ పంపారంటూ ప్రచారం జరుగుతున్నప్పటికీ.. దానిపైనా భిన్నాభిప్రాయాలు వ్యక్తమవుతున్న విషయం విదితమే.