‘మేడ్‌ ఇన్‌ చైనా’పై భారతీయుల ప్రేమ చచ్చిపోతుందా.?

మేడ్‌ ఇన్‌ చైనా.. ఆ పేరు చూస్తే చాలు.. ఎగబడి కొనేస్తాం. లక్షల ధర పలికే ఖరీదైన టీవీల దగ్గర్నుంచి రూపాయి ఖరీదుండే గుండు సూది వరకు.. చైనా ప్రోడక్ట్స్‌కి వుండే గిరాకీనే వేరు. డ్రాగన్‌ దేశం నుంచి దిగుమతి అయ్యే ఈ వస్తువుల పట్ల భారతీయులకు అంత ప్రేమ ఎందుకు.? ఎందుకంటే, మార్కెట్‌లో లభ్యమయ్యే చాలా వస్తువులతో పోల్చితే, చైనా ప్రోడక్ట్స్‌ ధరలు తక్కువే మరి. అదీ అసలు సంగతి.

క్వాలిటీ సంగతి దేవుడెరుగు.. ఐటమ్ చాలా గొప్పగా కన్పించేస్తుంది. అదే చైనా ప్రోడక్ట్‌ ప్రత్యేకత. పైగా, ఒక్కోసారి క్వాలిటీ విషయంలోనూ చైనానే బెస్ట్‌. పది రూపాయలు పెట్టి కొన్న ఓ ఆట బొమ్మ.. పాతికేళ్ళ లైఫ్‌ చూసేసినా ఆశ్చర్యపోవాల్సిన పనిలేదు. అందుకే, భారతీయులకి ‘మేడిన్‌ చైనా’ అంటే అంత పిచ్చి.

ఇప్పుడిదంతా ఎందుకంటే, ‘బ్యాన్‌ చైనా ప్రోడక్ట్స్‌’ అనే డిమాండ్‌ ఇప్పుడు తెరపైకి వచ్చింది గనుక. ‘మేం చైనా ప్రోడక్ట్స్‌ని బ్యాన్‌ చేస్తున్నాం..’ అని పలువురు సెలబ్రిటీలు సోషల్‌ మీడియా వేదికగా పబ్లిసిటీ స్టంట్లు షురూ చేశారు. సాధ్యమయ్యే పనేనా ఇది.? అని ఒక్కసారి ఆలోచిస్తే.. ‘అసాధ్యమైతే కాదుగానీ.. మనోళ్ళకు అంత చిత్తశుద్ధి లేదు’ అనే సమాధానం ఖచ్చితంగా వస్తుంది.

మన దేశంలో వాడుతున్న మొబైల్‌ ఫోన్ల లెక్కలు తీస్తే, చైనా ఆధిపత్యమే ఎక్కువ. ఎలక్ట్రానిక్‌ డివైజెస్‌లో సింహభాగం చైనాకే దక్కుతుందేమో. ఇవన్నీ ఉత్తుత్తి లెక్కలు కాదు.. నిఖార్సయిన లెక్కలే. చైనా – భారత్‌ మధ్య సరిహద్దు గొడవలు ఇప్పటివి కావు. చైనా చేతిలో ఓడిపోయాం.. చైనాకి ధీటుగా బదులిచ్చాం.. చైనా, అంతర్జాతీయ స్థాయిలో భారతదేశానికి వ్యతిరేకంగా నినదిస్తూనే వుంది.

భారతదేశ ప్రయోజనాల్ని దెబ్బతీసేలా చైనా ప్రవర్తిస్తూనే వుంది. మరి, 20 మంది సైనికుల మరణంతో.. రాత్రికి రాత్రి ‘బ్యాన్‌ చైనా ప్రోడక్ట్స్‌’ అంటే ఎలా.? చైనా వల్ల మన దేశానికి చాలా నష్టం జరిగింది, జరుగుతూనే వుంది.. చాలా సందర్భాల్లో ‘బ్యాన్‌ చైనా ప్రోడక్ట్స్‌’ నినాదం తెరపైకొచ్చింది. కానీ, చైనా ప్రోడక్ట్స్‌ని బ్యాన్‌ చేశామా.? లేదే.! పైగా, చైనా పారిశ్రామికవేత్తలకు రెడ్‌ కార్పెట్‌ వేస్తున్నాయి మన ప్రభుత్వాలు. ప్రపంచీకరణలో భాగంగా అలాంటివన్నీ తప్పకపోవచ్చనుకోండి.. అది వేరే విషయం.

చైనా మ్యాప్‌లను తగలబెట్టడం, చైనా నాయకుల దిష్టిబొమ్మలు తగలబెట్టడం.. ఇదంతా నూటికి నూరుపాళ్ళు మన ఆవేదనని తెలియజేయడమే. కానీ, ఆ కసి.. ఆ కోపం.. ఆ తెగువ.. నీటి బుడగలా మారిపోకూడదు. చైనా ప్రోడక్ట్స్‌ల్ని బ్యాన్‌ చేయాల్సి వస్తే.. మళ్ళీ ‘మేడిన్‌ చైనా’ అన్న మాటే మన దేశంలో వినకూడదు. మరి, అంత చిత్తశుద్ధి మనలో వుందంటారా.? ఇది సగటు భారతీయుడికి అగ్ని పరీక్ష. ఇది మనందరి బాధ్యత.