‘సీఎం దగ్గర మార్కుల కోసం నిందలేయొద్దు’.. హరీశ్ పై ఈటల ఆగ్రహం..!

హుజూరాబాద్ ఉప ఎన్నికల్లో తనను ఓడించేందుకు టీఆర్ఎస్ చేయాల్సిన ప్రయత్నాలన్నీ చేస్తోందని.. కానీ ఎన్నికల్లో గెలిచేది తానేనని మాజీ మంత్రి, బీజేపీ నేత ఈటల రాజేందర్ అన్నారు. జమ్మికుంటలో జరిగిన మీడియా సమావేశంలో ఆయన మాట్లాడారు.

‘హుజూరాబాద్ లో డబ్బు పంచేందుకు హైదరాబాద్ లో భూములు అమ్మేశారు. రైతు బంధు పథకాన్ని రాష్ట్రవ్యాప్తంగా అమలు చేస్తూ.. దళిత బంధు పథకాన్ని ఒక్క హుజూరాబాద్ లో మాత్రమే ఎందుకు అమలు చేస్తున్నారో చెప్పాలి. హుజూరాబాద్ ను తెలంగాణ వచ్చిన తర్వాత చాలా అభివృద్ధి చేశా. ఇక్కడ పెండింగ్ పనులు లేవు. రాష్ట్ర ప్రభుత్వం వద్ద కూడా డబ్బులు లేవు కాబట్టే.. మధ్యాహ్న భోజన నిర్వాహకులకు డబ్బులు చెల్లించలేకపోతున్నారు’.

‘నాకు ఓటేస్తే ప్రభుత్వ పథకాల నుంచి పేర్లు తొలగిస్తామని ప్రచారం చేస్తున్నారు. కర్ర కాల్చి వాత పెట్టినట్టు.. ఓడించిన దుబ్బాకలో అదే పని చేసారా..? ప్రజలు మీ మాటలు వినే, భయపడే పరిస్థితిల్లో లేరు. మూడు నెలల నుంచీ ఇక్కడ ప్రచారం చేస్తున్నా.. హుజూరాబాద్ లో గెలుపు నాదే. మామ మెప్పు కోసం హరీశ్ రావు నాపై ఏవేవో వ్యాఖ్యలు చేస్తున్నారు. మనది 18 ఏళ్ల బంధం. గతం మర్చిపోయి సీఎం దగ్గర మార్కులు కొట్టేయడానికి నాపై ఆరోపణలు చేయొద్దు. చిల్లర ఆరోపణలు చేస్తే ప్రజలు మిమ్మల్ని క్షమించరు’.

‘హుజూరాబాద్ లో నేను అభివృద్ధి చేయలేదంటున్న హరీశ్.. ప్రచారంలో భాగంగా మీరు హుజూరాబాద్ లో తిరుగుతున్న రోడ్లన్నీ నేనే వేయించాను. ఇక్కడ పెండింగ్ పనులేమీ లేవు. మీరెంత కుటిల ప్రయత్నాలు చేసినా హుజూరాబాద్ లో దుబ్బాక ఫలితమే పునరావృతం కాబోతోంది. టటీఆర్ఎస్ ను కైవసం చేసుకోవాలని మీరు ప్రయత్నాలు చేస్తున్నారు. అది జరిగే పని కాదు.’ అని అన్నారు.